अभिषेकको शतकमा हैदराबाद विजयी

काठमाडौँ– ओपनर अभिषेक शर्माको शतकमा सनराइजर्स हैदराबादले इन्डियन प्रिमियर लिग (आईपीएल) क्रिकेटमा दोस्रो जित हासिल गरेको छ। 

हैदराबादले शनिबार राति भएको खेलमा पन्जाब किंग्समाथि घरेलु मैदानमा ८ विकेटको सानदार जित दर्ता गरेको हो। 

राजिव गान्धी अन्तर्राष्ट्रिय रंगशालामा पन्जाबले दिएको २४६ रनको लक्ष्य हैदराबादले १८.३ ओभरमा २ विकेटको क्षतिमा पूरा गर्‍यो। अभिषेकले आक्रामक ब्याटिङ गर्दै १४१ रन बनाए। उनले ५५ बलमा १४ चौका र १० छक्का प्रहार गरेका थिए। अर्का ‌ओपनर ट्राभिस हेडले ६६ रन बनाए। 

पन्जाबका आर्शदीप सिंह र युजभेन्द्र चहालले समान १–१ विकेट लिए।

त्यसअघि टस हारेर पहिले ब्याटिङमा उत्रिएको पन्जाबले २० ओभरमा ६ विकेट गुमाएर २४५ रन बनायो। कप्तान श्रेयस अय्यरले सर्वाधिक ८२ रन बनाए। प्रभसिमरन सिंहले ४२ रनको योगदान दिए। मार्कस स्टोइनिस ३४ रनमा अविजित रहे।

हैदराबादका हर्शल पटेलले ४ तथा इशान मलिंगाले २ विकेट लिए। जारी सिजनमा ६ खेलमा टोलीको यो दोस्रो जित हो।