यू१९ विश्वकप एशिया छनोट : नेपालको लगातार दोस्रो जित

काठमाडौँ– आईसीसी यू१९ विश्वकप एसिया छनोटमा नेपालले ओमानलाई पराजित गरेको छ।

माथिल्लो मूलपानी क्रिकेट मैदानमा सोमबार भएको खेलमा नेपालले ओमानलाई ८ विकेटले पराजित गरेको हो।

नेपालको यो लगातार दोस्रो जित हो। यसअघि पहिलो खेलमा नेपालले यूएईलाई ५ रनले पराजित गरेको थियो।

सोमबार ओमानले दिएको ११८ रनको लक्ष्य नेपालले १४.३ ओभरमा २ विकेटको क्षतिमा पूरा गर्‍यो।

नेपालका लागि शाहिल पटेलले ४४ र नीरजकुमार यादवले ४६ रन बनाए। नरेन भट्ट १२ र सन्तोष यादव १० रनमा अविजित रहे।

ओमानका लागि सौम्या भाविन सम्पतले २ विकेट लिए।

यसअघि पहिले ब्याटिङ गरेको ओमान ३८ ओभरमा ११७ रन बनाएर अलआउट भएको थियो।

अब अर्को खेलमा नेपालले बुधबार हङकङसँग प्रतिस्पर्धा गर्नेछ।