संघीय संसद्को अधिवेशन वैशाख १२ गते आह्वान गर्न सिफारिस

काठमाडौँ– सरकारले संघीय संसद्को अधिवेशन यही वैशाख १२ गते आह्वान गर्न राष्ट्रपति रामचन्द्र पौडेलसमक्ष सिफारिस गर्ने निर्णय गरेको छ।

मन्त्रिपरिषद्को मंगलबार साँझ बसेको बैठकले वर्षे अधिवेशन वैशाख १२ गते दिउँसो १ बजे बस्ने गरी आह्वान गर्न सिफारिस गर्ने निर्णय गरेको शिक्षा, विज्ञान तथा प्रविधिमन्त्री विद्या भट्टराईले जानकारी दिइन्। 

संघीय संसद्‌मा विचाराधीन अवस्थामा रहेको विद्यालय शिक्षा विधेयक यथाशक्य पारित गर्ने प्रयोजनका लागि संघीय संसद्को अधिवेशन आह्वान गरिएको सरकारले जनाएको छ।

सरकारको तर्फबाट सो विधेयक पारित गर्न आवश्यक समन्वय र सहजीकरण गर्ने बैठकले निर्णय गरेको छ। विभिन्न माग राखेर दुई सातादेखि शिक्षकले राजधानीमा प्रदर्शन गर्दै आएका छन्। 

उनीहरूको माग सम्बोधन गर्ने उद्देश्यले सरकारले संघीय संसद्को बैठक आह्वान गरेको स्पष्ट पारेको छ।