युक्रेन र अमेरिकाबीच प्राकृतिक स्रोत तथा खनिजसम्बन्धी समझदारी पत्रमा हस्ताक्षर

युक्रेन र अमेरिकाले किएभको प्राकृतिक स्रोत तथा खनिजमा अमेरिकाको पहुँच रहने सम्झौतासहितको समझदारी पत्रमा बिहीबार हस्ताक्षर गरेका छन्। 

युक्रेनको पुनर्निर्माणका लागि आर्थिक साझेदारी सम्झौता र लगानी कोष स्थापनाका लागि अमेरिकी समझदारी पत्रमा हस्ताक्षर भएको युक्रेनकी प्रथम उपप्रधानमन्त्री युलिया स्विरिडेन्कोले बताइन्। 

“युक्रेनको पुनर्निर्माण, पूर्वाधार विकास व्यापार सहयोग र आर्थिक अवसरका लागि लगानी आकर्षित गर्न यो कोष प्रभावकारी माध्यम बन्ने आशा छ,” उनले भनिन्।  

किएभ र वासिंटनले केही हप्ताअघि नै युक्रेनको खनिज उत्खनन गर्ने सम्झौतामा हस्ताक्षर गर्ने योजना बनाएका थिए। तर फेब्रुअरीमा राष्ट्रपति डोनाल्ड ट्रम्प र भोलोदिमिर जेलेन्स्कीबीच उत्पन्न असमझदारीले प्रक्रियामा अवरोध पुर्‍याएको थियो।