दाङमा बस दुर्घटना हुँदा २ जनाको मृत्यु

काठमाडौँ– दाङको लमही-भालुबांग सडक खण्डअन्तर्गत सिंगेखोला नजिकै शुक्रबार बेलुका यात्रुवाहक बस दुर्घटना हुँदा २ जनाको मृत्यु भएको छ। कपिलवस्तुको कृष्णनगरबाट लमहीतर्फ आउँदै गरेको बा ३ ख ७९९६ नम्बरको बस राप्ती–५ लठह्वामा दुर्घटनामा परेको हो।

बस दुर्घटनामा परी मृत्यु हुनेमा एक महिला र एक पुरुष छन्। जिल्ला प्रहरी कार्यालय दाङका अनुसार राजपुर गाउँपालिका–५ का ५६ वर्षीय नीलसरोज यादव र घोराहीकी अन्दाजी ३०/३५ वर्षकी पुष्पा डाँगीको मृत्यु भएको हो।

दुर्घटनामा १० जनाभन्दा बढी यात्रु घाइते भएको र उनीहरूको सिसहनियाँ र लमहीमा उपचार भइरहेको प्रहरीले जनाएको छ। उद्धार कार्य जारी रहेकाले घाइतेहरूको यकिन संख्या अझै पुष्टि हुन बाँकी रहेको प्रहरीको भनाइ छ। बस अनियन्त्रित भई सडक किनारामा पल्टिएको थियो।