वर्षासँगै सूर्यविनायक–साँगा सडक एकतर्फी

भक्तपुर– अरनिको राजमार्गअन्तर्गत भक्तपुरको सूर्यविनायक जगाती हुँदै  काभ्रेपलान्चोक जाने सडक एकतर्फी सञ्चालन गरिएको छ।

वर्षा भएपछि शनिबार सडक एकतर्फी सञ्चालन गरिएको हो। वर्षा भएसँगै काभ्रेको साँगाबाट भक्तपुरतर्फ आउने सडक खण्ड एकतर्फी सञ्चालन गर्नुपरेको भक्तपुर ट्राफिक प्रहरी कार्यालयका प्रमुख प्रहरी निरीक्षक प्रदीप खत्रीले जानकारी दिए।

वर्षापछि सडकमा हिलोका कारण सवारीसाधन चिप्लिएर जोखिम बढेपछि काभ्रेबाट भक्तपुरतर्फ आउनेलाई मात्रै साँगाबाट आउन दिएको उनले बताए। उनका अनुसार भक्तपुर हुँदै काभ्रे जाने दुई पांग्रेलगायत हल्का चारपांग्रे सवारीसाधनहरू जगातीबाट च्याम्हसिंह हुँदै ताथली नाला सडकबाट बनेपा निस्कने गरी व्यवस्था मिलाइएको छ।

भक्तपुरबाट काभ्रे जाने ठूला मालवाहक सवारीसाधनलाई भने जगातीमै रोकिएको छ। सूर्यविनायक धुलिखेल सडकखण्ड निर्माणाधीन अवस्थामा रहेका कारण साँगा खण्डमा हल्का वर्षाले पनि सडक हिलाम्मे हुने र सवारीसाधन चिप्लिने समस्या हुने गरेको छ।