एकछिन फोन गर्नका लागि भन्दै मोबाइल मागेर फरार हुने ३ जना पक्राउ

काठमाडौँ– झुक्याएर मोबाइल लुटपाटमा संलग्न तीन जनालाई प्रहरीले पक्राउ गरेको छ। पक्राउ पर्नेमा सिन्धुलीको सुनकोशी गाउँपालिका-१ का १८ वर्षीय शिखरजंग थापा भन्ने नवराज सुनुवार, धनुषाको तारापटी सिर्सिया गाउँपालिका-६ का राज यादव र राैतहटको गरुडा नगरपालिका-२ का २७ वर्षीय सुरेश ठाकुर हजाम रहेका छन्।

पीडितले दिएको उजुरीका आधारमा उनीहरूलाई काठमाडाैँका विभिन्न ठाउँबाट पक्राउ गरिएको जिल्ला प्रहरी परिसर काठमाडाैँले जनाएको छ। काठमाडाैँको ठमेल र धुम्बाराही क्षेत्रमा ट्याक्सी चालकहरूसँग विभिन्न बहानामा कुरा गरी, कतै जाने बाटो सोधी, साथीलाई फोन गर्छु भन्दै मोबाइल मागेर फरार हुने गरेका थिए। उनीहरूले यसरी अहिलेसम्म ४ वटा मोबाइल लुटपाट गरेको प्रारम्भिक अनुसन्धानमा खुलेको छ। 

परिसरका अनुसार उनीहरूबाट एक एमटी-१५ मोटरसाइकल र विभिन्न कम्पनीका तीन वटा मोबाइल बरामद गरिएको छ। उनीहरूलाई अदालतबाट ५ दिनको म्याद लिई थप अनुसन्धान भइरहेको परिसरका सूचना अधिकारी प्रहरी उपरीक्षक अपीलराज बोहराले बताए।

प्रहरीले लुटपाटमा संलग्न अन्य व्यक्तिको खोजी कार्य पनि जारी राखेको छ।