चितवनमा सञ्चालित उद्योग–व्यवसायमा कोभिडको असर कायमै

चितवन– कोरोना महामारीका कारण बन्द भएका उद्योगको समस्या अझै समाधान हुन सकेको छैन। निरन्तरको प्रयासपछि केही उद्योग पुरानै लयमा सञ्चालन हुन थाले पनि अधिकांश उद्योगमा कोरोनाको असर अझै कायमै रहेको जानकारहरूको भनाइ छ।

नेपाल उद्योग परिसंघ बागमती प्रदेशका वरिष्ठ उपाध्यक्ष त्रिलोचन कँडेल प्रदेशभित्रका ४० प्रतिशत उद्योग अझै बन्द अवस्थामा रहेको बताउँछन्। सञ्चालनमा रहेका ६० प्रतिशतमध्ये १० प्रतिशत मात्रै नाफामा रहेको उनको भनाइ छ। उद्योग संघ चितवनका पूर्वअध्यक्षसमेत रहेका कँडेल बैंकको ऋणका लागि मात्रै उद्योग चलाउने धेरै रहेको बताउँछन्।

“ऋण थप्दै जाँदा अहिले धितोले ऋण नधान्ने अवस्थामा पुगेको छ, यसले उद्योगमा ऋण लगानी गर्ने बैंकलाई पनि समस्या भएको छ”, उनले भने “बल्लतल्ल उत्पादन शुरू भए पनि माग बढ्न नसकेको अवस्था छ।” 

कच्चापदार्थ किन्ने पैसा नहुँदा कम क्षमतामा उद्योग सञ्चालन हुँदा घाटा चुलिँदै गएको उनले बताए। बढ्दो ऋणका कारण उद्योगको अवस्था कमजोर बनेको उनको बुझाइ छ। “गत वर्षसम्म महँगो बैंक ब्याजले पनि उद्योगलाई अप्ठ्यारो पारेको थियो। मजदुरको बढ्दो ज्याला, महँगो ढुवानी, कच्चापदार्थको मूल्यवृद्धिलगायतका कारण नेपाली उत्पादनको लागत बढेको र विदेशी वस्तुसँग प्रतिस्पर्धा गर्न नसकेको अवस्था छ”, कँडेलले बताए। 

नेपाल लेयर्स कुखुरापालक संघका अध्यक्ष विनोद पोखरेल कोरोनाकै कारण धेरै पोल्ट्री व्यवसायीले पेसा छाडिसकेको बताउँछन्। सञ्चालनमा रहेका अधिकांश उद्योग ऋणको मारमा रहेको उनको भनाइ छ। वर्ष दिनमा एक पटक अण्डाले लागत मूल्य पाउँदा सरकारी निकायको ध्यानाकर्षण हुने भए पनि वर्षौंसम्म नोक्सानमा काम गर्नुपर्दा राज्यले ध्यान नदिएको उनको गुनासो छ।

भारतीय सीमा क्षेत्रबाट अवैध रूपमा भित्रिने पोल्ट्रीजन्य पदार्थ रोकिए मात्रै पनि यहाँका पोल्ट्री व्यवसायीलाई केही राहत मिल्ने उनको बुझाइ छ। यस्तै अवस्था रहेमा आत्मनिर्भर यो व्यवसाय समाप्त भएर जाने उनको दाबी छ। 

क्षेत्रीय होटल संघ सौराहाका अध्यक्ष ओमप्रकाश पाण्डे आधा होटल आर्थिक संघटमा परेको बताउँछन्। होटल चल्नका लागि कम्तीमा औसतमा ६० प्रतिशत अकुपेन्सी हुनुपर्छ तर हाल औसतमा ५० प्रतिशतभन्दा कममा सञ्चालन गरिरहनुपरेको अवस्था छ। 

दिनहुँ घाटा बढ्दै जाँदा पर्यटन उद्योगमा संकट थपिँदै गएको उनको दाबी छ। विदेशी पर्यटकको संख्या नबढाएसम्म आर्थिक समृद्धि नहुने भन्दै उनले नेपाली पर्यटक आएर मात्रै क्षणिक सञ्चालन हुन सके पनि दीर्घकालीन समस्या समाधान नहुने बताए। 

चितवनको पर्यटन व्यवसाय प्रभावित हुनुको प्रमुख कारण सडक सञ्जाल पनि भएको उनको भनाइ छ। भैरहवा, पोखरा र काठमाडौँबाट आउने पर्यटक सडकका कारण आउन नसकेको उनले बताए। “ट्राभल कम्पनीहरूले सडकका कारण पर्यटक पठाउनै छाडेका छन्,” उनले भने।

कोभिडपछि व्यवसाय सञ्चालन हुन नसक्दा कतिपय होटलमा बैंकले ताला लगाउने अवस्था समेत आएको उनको भनाइ छ। 

उद्योग वाणिज्य संघ चितवनका वरिष्ठ उपाध्यक्ष चिरञ्जीवी सुवेदी कोभिडपछि बजार क्षेत्रका धेरै पसल बन्द भएको बताउँछन्।

समग्र अर्थतन्त्र प्रभावित भएपछि उद्योग र व्यवसाय पनि प्रभावित बनेको उनको भनाइ छ। सरकारले उद्योग व्यवसायका समस्यालाई मसिनो गरी केलाएर सम्बोधन गर्नुपर्ने उनको माग छ। ऋण थप्दै जाँदा धितोले धान्न नसक्ने अवस्थामा उद्योगी पुगेको उनी बताउँछन्। “अब पनि सरकारले सम्बोधन गरेन भने नेपालमा उद्योग टिकाउन निकै सकस हुन्छ,” उनले भने।

उद्योग वाणिज्य संघ चितवनका पूर्वअध्यक्ष राजन गौतमले भने लामो समयको मिहिनेत र लगानीपछि गौमन्त्र नामक अर्ग्यानिक मल कम्पनी लयमा फर्किएको बताए। उनले कमर्सियल अर्ग्यानिक एग्रिकल्चर कन्सेप्ट प्रालि सञ्चालन गर्दै आएका छन्।

“कोरोना महामारीका कारण केही समय उत्पादन ठप्प गरेको कम्पनी अहिले बल्लतल्ल लयमा फर्किएको छ, तर अहिले पनि समस्या बाँकी नै छन्, माग बढ्न नसक्दा उत्पादनले बजार पाउन सकेको छैन”, उनले भने।