दानव खोलामा बेपत्ता तीन बालकमध्ये एकको शव भेटियो

दानव खोलामा बेपत्ता तीन बालकमध्ये एकको शव भेटिएको, अरूको खोजी भइरहेको जिल्ला प्रहरी कार्यालय, रुपन्देहीले जनाएको छ।

उकालो

सोमबार, ८ बैशाख, २०८२

दानव खोलामा बेपत्ता तीन बालकमध्ये एकको शव भेटियो
प्रतीकात्मक तस्वीर

भैरहवा– रुपन्देहीको दानव खोलामा बेपत्ता तीन बालकमध्ये एकको शव भेटिएको छ भने समाचार तयार पार्दासम्म दुई अझै बेपत्ता छन्। 

जिल्ला प्रहरी कार्यालयका प्रवक्ता प्रहरी नायब उपरीक्षक सुरज कार्कीले १४ वर्षीय राजन यादवको शव डुबेको स्थाननजिकै फेला परेको बताए। 

लुम्बिनी सांस्कृतिक नगरपालिका–२ सानो अर्दौलाका तीन बालक साथीसँगै गाउँनजिकैको दानव खोलामा पौडी खेल्न गएका थिए।

बगहा बाबा मन्दिरनजिकै नुहाउने क्रममा तीनै जना नदीको गहिरो भागमा पुगेको प्रत्यक्षदर्शी एक बालकले जानकारी दिएको वडाध्यक्ष ईनामुल्ला फकिरले जानकारी दिए। 

मृत अवस्थामा भेटिएका बालकको मूल घर त्यही भए पनि उनी बुबाआमासहित रुपन्देहीकै सैनामैना बस्थे। हाल विद्यालय बिदा रहेकाले उनी दुई दिनअघि मात्रै मूल घर आएका थिए। 

बेपत्ता बालकको खोजी भइरहेको प्रहरी नायब उपरीक्षक कार्कीले जानकारी दिए। 

सोमबार दिउँसो लुम्बिनी सांस्कृतिक नगरपालिका–२ अर्दौलामा रहेको दानव नदीमा पौडी खेल्ने क्रममा सोही वडामा बस्ने १३ वर्षीय उमेश यादव, १४ वर्षीय राजन यादव र १२ वर्षीय मन्नु हरिजन बेपत्ता भएका थिए। 

प्रतिक्रिया दिनुहोस !