पहिरोले खाँदबारी–किमाथांका सडकखण्ड अवरुद्ध

बुधबार राति वर्षासँगै आएको पहिरोले खाँदबारी–किमाथांका खण्डअन्तर्गत मकालु-३ क्षेत्रको सडक बगाएपछि सवारी आवागमन अवरुद्ध भएको प्रहरीले जनाएको छ।

उकालो

बिहिबार, ११ बैशाख, २०८२

पहिरोले खाँदबारी–किमाथांका सडकखण्ड अवरुद्ध
खादबारी–किमाथांका सडक। तस्वीरः रासस

संखुवासभा– उत्तर–दक्षिण कोशी राजमार्गअन्तर्गत संखुवासभाको मकाल र भोटखोला गाउँपालिकामा सडक अवरुद्ध भएको छ। लगातारको वर्षासँगै आएको पहिरोले मकालु गाउँपालिका–३ धर्मद्धारस्थित खाँदबारी-किमाथांका खण्ड अवरुद्ध भएको हो। 

बुधबार रातिको वर्षासँगै आएको पहिरोले खाँदबारी-किमाथांका खण्डअन्तर्गत मकालु-३ क्षेत्रको सडक बगाएपछि आवागमन अवरुद्ध भएको जिल्ला प्रहरी कार्यालयका प्रहरी निरीक्षक अभिषेक श्रेष्ठले जानकारी दिए। उनका अनुसार सडक अवरुद्ध हुँदा मकालु-३ र ४ तथा भोटखोला गाउँपालिका जाने सवारीसाधन सञ्चालन हुन सकेका छैनन्।

माथिल्लो क्षेत्रमा लगातार वर्षा भइरहेकाले पहिरो हटाउन समस्या भएको उत्तर-दक्षिण कोशी सडक आयोजना कार्यालयले जनाएको छ। अहिले सदरमुकाम खाँदबारीबाट मकालु र भोटखोला जाने यातायात मकालु गाउँपालिकाको फ्याक्सिन्दासम्म मात्रै सञ्चालन भइरहेका छन्।

प्रतिक्रिया दिनुहोस !