डढेलो फैलिँदा नवदुर्गाका गाउँपालिकाको कार्यालयमा क्षति

डडेलधुरा– नवदुर्गा गाउँपालिकाको कार्यालयका तीन वटा शाखामा डढेलोले क्षति पुर्‍याएको छ। जंगलमा लागेको डढेलो फैलिएपछि स्वास्थ्य, महिला तथा बालबालिका र आन्तरिक लेखा परीक्षण शाखामा क्षति पुगेको प्रमुख प्रशासकीय अधिकृत अमितकुमार साहले जानकारी दिए।

शनिबार दिउँसो आगलागी हुँदा प्रिप्याफ भवन र भवनमा रहेका महत्त्वपूर्ण कागजात जलेर नष्ट भएका उनले बताए। जंगल क्षेत्रमा आगो नियन्त्रणमा नआएकाले जोखिम कायमै रहेको र स्थानीय, नेपाली सेना र प्रहरी संयुक्त रूपमा आगो निभाउने प्रयासमा जुटिरहेका छन्।

दुर्गा भवानी सामुदायिक वनमा लागेको डढेलोको आगो हावाको कारणले पालिकासम्म पुगेको हो। पालिका कार्यालयले हालसम्म क्षतिको यकिन विवरण संकलन गर्न नसकेको जनाइएको छ।