झडपमा शिक्षक, प्रहरी र पत्रकारसहित २६ जना घाइते

काठमाडौँ– काठमाडौँको नयाँ बानेश्वरस्थित सडकमा आन्दोलन गरिरहेका शिक्षकले निषेधित क्षेत्र तोड्न खोजेपछि भएको झडपमा शिक्षक, पत्रकार र प्रहरीसहित २६ जना घाइते भएका छन्।

विगत २६ दिनदेखि आन्दोलन गरिरहेका शिक्षकले आइतबार निषेधित क्षेत्र तोड्न खोजेपछि रोक्न खोज्दा उक्त झडप भएको हो। 

झडपका क्रममा पाँच प्रहरी, एक पत्रकार र २० शिक्षक घाइते भएका जिल्ला प्रहरी परिसर काठमाडौँका प्रवक्ता, प्रहरी उपरीक्षक अपीलराज बोहराले जानकारी दिए। 

तर शिक्षकहरूले भने ३१ जना विद्यालय शिक्षक तथा कर्मचारी घाइते भएको भन्दै नामावली सार्वजनिक गरेका छन्। घाइतेको काठमाडौँका विभिन्न अस्पतालमा उपचार भइरहेको प्रहरीको भनाइ छ।

शिक्षकले निषेधित क्षेत्र तोड्न खोज्दा प्रहरीले पानीको फोहोरसमेत हानेको थियो।