धरानबाट भोजपुर आउँदै गरेको बस दुर्घटना हुँदा १ को मृत्यु, १३ जना घाइते‍

धरानबाट भोजपुरतर्फ आउँदै गरेको बस धनकुटाको गोठगाउँमा दुर्घटना हुँदा एक जनाको मृत्यु भएको छ भने १३ जना घाइते भएका छन्।

उकालो

सोमबार, २२ बैशाख, २०८२

धरानबाट भोजपुर आउँदै गरेको बस दुर्घटना हुँदा १ को मृत्यु, १३ जना घाइते‍

भोजपुर– धनकुटाको गोठगाउँमा बस दुर्घटनामा पर्दा एक जनाको मृत्यु भएको छ भने १३ जना घाइते भएका छन्। घाइतेमध्ये तीन जनाको अवस्था गम्भीर रहेको जिल्ला प्रहरी कार्यालय धनकुटाले जनाएको छ। 

धरानबाट भोजपुरतर्फ आउँदै गरेको को १ ख २१७७ नम्बरको यात्रुवाहक बस सोमबार बिहान १०ः१५ बजेतिर धनकुटा नगरपालिका–६ गोठगाँउस्थित कोशी लोकमार्गमा सडकबाट तल खस्दा दुर्घटना भएको हो।

दुर्घटनामा परी १४ जना घाइते भएकामा धनकुटा नगरपालिका–६ बस्ने ७३ वर्षीया कृष्णकुमारी राईको उपचारको क्रममा मृत्यु भएको जिल्ला प्रहरी कार्यालय धनकुटाले जनाएको छ। घाइतेलाई उद्धार गरी उपचारका लागि जिल्ला अस्पताल धनकुटा लगिएको छ।

अन्य घाइतेमा भोजपुरको षडानन्द नगरपालिका–१३  का सूर्यमणि तामाङ, सोही स्थानका अनमोल तामाङ, सुनसरीको बराहक्षेत्र नगरपालिका–२ का कृष्ण राउत, बस चालक सुनसरीको धरान उपमहानगरपालिका–१३ का रुद्र तामाङ, भोजपुर, पौवादुङमा गाउँपालिका–३ च्याङग्रेका गंगाप्रसाद सापकोटा रहेका छन्।

साथै भोजपुर नगरपालिका–११ का सविना बराइली, सोही ठाउँका देवी टविक, धनकुटाको साँगुरीगढी गाउँपालिका–६ का हंशबहादुर राई, भोजपुरको षडानन्द नगरपालिका–११ का पूर्णमाया तामाङ, भोजपुर नगरपालिका–११ का लीलाबहादुर श्रेष्ठ, धनकुटा साँगुरीगढी गाउँपालिका–६ का दीर्घमाया राई, इटहरीका आयुष राई र धनकुटा–६ का धनकुमार विक पनि घाइते भएको प्रहरीले उल्लेख गरेको छ।

प्रतिक्रिया दिनुहोस !