बागलुङमा हलगोरु पाल्ने १७८ किसानले पाए पोषणभत्ता

गलकोट– बागलुङको काठेखोला गाउँपालिकाले हलगोरु पाल्ने किसानलाई पोषणभत्ता वितरण गरेको छ। गाउँपालिकाले ‘गोरुलाई पोषण, कृषकलाई प्रोत्साहन’ नीति तथा कार्यक्रमअन्तर्गत हलगोरु पाल्ने १७८ किसानलाई ५ हजार रुपैयाँका दरले प्रदान गरेको हो।

परम्परागत तरिकाले खेतबारी जोत्नका लागि प्रयोग गरिने गोरुलाई संरक्षण गर्दै किसानलाई प्रोत्साहन गर्ने उद्देश्यले ८ लाख ९० हजार रुपैयाँ सोझै किसानको हातमा पुर्‍याइएको अध्यक्ष राजु थापाले बताए। 

“हलगोरु पाल्ने र जोत्ने परम्परा हट्दै जान थालेपछि यसको संरक्षणका लागि कार्यक्रम अघि बढाएका थियौँ। पालिकाले गोरु संरक्षण र मलमूत्रको उपयोगिता बढाउनका लागि पहिलो पटक यो कार्यक्रम ल्याएको हो,” अध्यक्ष थापाले भने, “गाउँपालिकाले यस कार्यक्रमलाई निरन्तरता दिन्छ।”

आधुनिकताको नाममा मिनी टिलर हलो वितरण हुन थालेपछि यस्तो कार्यक्रम ल्याइएको गाउँपालिकाले जनाएको छ। “विभिन्न स्थानीय तहमा कृषिमा आधुनिकीकरणका नाममा मिनी टिलर हलो वितरण गर्ने लहडै चलेको छ। तर हामीले गाउँ–गाउँमा परम्परागतखेती गर्नका लागि हलगोरु नै उपयुक्त देखेका छौँ। कृषिमा मलमूत्रको प्रयोग अपरिहार्य रहेकाले किसानलाई प्रोत्साहन गर्न यो अभियान सुरु गरेका हौँ,” अध्यक्ष थापाले भने। 

यसैगरी, दूध उत्पादन गर्ने किसानले प्रतिलिटर साढे दुई रुपैयाँका दरले अनुदान पाएका छन्। वडास्तरमा माइनर ल्याब स्थापना गरी पशु सेवा दिइएको उनले बताए। 

गाउँपालिका–७ रेशका गोरुपालक किसान डम्मरबहादुर थापाले गोरु पाल्ने किसानले पहिलो पटक सहयोग पाउँदा सम्मानको महसुस गरेको बताए। रेशमा आफूजस्ता हलगोरु पाल्ने पाँच जना किसानले अनुदान पाएको बताए।