भारत–पाकिस्तान बढ्दो तनाव, विमानस्थलहरू बन्द

भारत र पाकिस्तानबीच भएको ड्रोन र मिसाइल आक्रमणको आरोप–प्रत्यारोपपछि दुवै देशले आन्तरिक सुरक्षामा उच्च सतर्कता अपनाएका छन्। भारतीय सञ्चार माध्यमहरूका अनुसार भारतले सुरक्षा जोखिमलाई ध्यानमा राख्दै २४ वटा विमानस्थल अस्थायी रूपमा बन्द गरेको छ।

भारतीय पत्रिका हिन्दुस्तान टाइम्सका अनुसार दिल्ली अन्तर्राष्ट्रिय विमानस्थलमा मात्रै ९० उडान रद्द गरिएका छन्। पाकिस्तानबाट भएको हवाई गतिविधिका कारण भारतको नागरिक उड्डयन प्राधिकरणले यस्तो निर्णय गरेको बताइएको छ।

नागरिक उड्डयन सुरक्षा ब्युरो (बीसीएएस)ले देशभरका सबै एयरलाइन्स र विमानस्थललाई सुरक्षा उपाय बढाउनसमेत निर्देशन दिएको छ।

निर्देशन अनुसार, सबै विमानस्थलहरूमा सबै यात्रुहरूको जाँच गरिनेछ। टर्मिनल भवनमा आगन्तुकको प्रवेश निषेध गरिएको छ।

एयर मार्सल तैनाथ गर्न निर्देशन दिइएको छ।  एयर इन्डियाले आन्तरिक यात्रुहरूले तीन घण्टाअगाडि विमानस्थल पुग्नुपर्ने बताएको छ। ७५ मिनेट अगाडि चेक–इन बन्द हुने जनाएको छ।