कञ्चनजंघा आरोहणका क्रममा फ्रान्सेली नागरिकको मृत्यु

ताप्लेजुङ– कञ्चनजंघा हिमाल आरोहणका क्रममा एक फ्रान्सेली नागरिकको मृत्यु भएको छ। आरोहणमा गएका दुई जना फ्रान्सेली नागरिकमध्ये ६३ वर्षीया मार्गेटा मोरिङको मृत्यु भएको हो।

सिरीजंघा गाउँपालिका–८ स्थित कञ्चनजंघा हिमालको दक्षिणी धारबाट वैशाख २६ गते आरोहण शुरू गरेका उनीहरू वैशाख २७ गते राति करिब ११ बजे आठ हजार मिटरको उचाइमा पुगेका थिए। सोही क्रममा श्वासप्रश्वासमा समस्या देखिएपछि मार्गेटाको मृत्यु भएको जिल्ला प्रहरी कार्यालयले जनाएको छ।

फ्रान्सेली आरोही मार्गेटा मोरिङसँगै रहेका गाइड योगेन्द्र तामाङलाई उद्धृत गर्दै प्रहरीले जनाएको छ। मृतकको शव समुद्री सतहदेखि करिब सात हजार ५०० मिटर उचाइमा रहेको जनाइएको छ।