भारतमा केही उडान अझै रद्द, यात्रुलाई ट्राभल एड्भाइजरीको पालन गर्न आग्रह

एयर इन्डियाले मंगलबारका लागि केही उडान रद्द गरेको छ। भारत र पाकिस्तानबीच हालै भएको चार दिनको सैन्य झडपपछि १० मेमा युद्धविरामको सहमति भएको थियो। तर त्यसपछि पनि सीमावर्ती क्षेत्रमा तनाव कायम रहेकाले केही प्रमुख एयरलाइन्सले सावधानी अपनाउँदै उडान रद्द गरेका छन् ।

भारतको निजी विमान सेवा प्रदायक एयर इन्डिया र इन्डिगोले मंगलबार सीमावर्ती क्षेत्रका केही विमानस्थलबाट हुने उडान रद्द गरेको जानकारी दिएका छन्। एयर इन्डियाले आफ्नो एक्स खातामा लेखेको छ, “हालको घटनाक्रम र यात्रुको सुरक्षालाई ध्यानमा राख्दै मे १३ मंगलबार जम्मु, लेह, जोधपुर, अमृतसर, भुज, जामनगर, चण्डीगढ़ र राजकोटबाट हुने सबै उडान रद्द गरिएको जानकारी गराउँछौँ।”

इन्डिगोले पनि जम्मु, अमृतसर, चण्डीगढ़, लेह, श्रीनगर र राजकोटबाट हुने उडान रद्द गरिएको जनाएको छ। 

यसबीच, भारतीय सेनाले सोमबार जम्मु कश्मीरको साम्बा क्षेत्रमा संदिग्ध ड्रोन देखिएको दाबी गरेको छ, जसले अझै पनि सुरक्षा अवस्था संवेदनशील रहेको संकेत गरेको जनाइएको छ। यात्रुलाई ट्राभल एड्भाइजरीको पालना गर्दै सतर्कता अपनाउन सुझाव दिइएको छ।