टी–२० विश्वकप एशिया छनोटको 'सुपर थ्री'मा पुग्यो नेपाल

काठमाडौँ– थाइल्यान्डमा जारी आईसीसी महिला टी–२० विश्वकप एशिया छनोटको खेलमा नेपालले सुपर थ्रीमा स्थान पक्का गरेको छ। शुक्रबार तय भएको हङकङ र बहराइनबीचको खेल वर्षाले रद्द भएपछि सुपर थ्रीमा नेपालको स्थान पक्का भएको हो।

बिहीबारको खेलमा बहराइनलाई ६ विकेटले हराएसँगै नेपालको सुपर थ्रीमा पुग्ने सम्भावना बलियो बनेको थियो। नेपालले ४ खेलमा २ जित, १ हार र १ रद्द खेलले ५ अंक जोडेको छ। नेपाल र हङकङको समान ५-५ अंक थियो। तर, नेपाल बढी जित निकालेका आधारमा दोस्रो चरणमा पुगेको हो।

छनोटमा सहभागी ९ टिमलाई ३ समूहमा विभाजन गरिएको थियो। हरेक समूहको विजेता सुपर थ्रीमा प्रतिस्पर्धा गर्ने प्रावधानअनुसार नेपाल, यूएई र थाइल्यान्डले सुपर थ्रीमा खेल्नेछन्।