हिमाली क्षेत्रमा औसतभन्दा अधिक वर्षा, मासिँदै माटोका छाना भएका घर

मनाङ– हिमाली क्षेत्रमा पानी पर्दैन भन्ने कथन पछिल्लो समय फेरिएको छ। विगतमा पानीको आवश्यकता नै हिउँले पूर्ति गर्ने हिमाली जिल्ला मनाङमा अहिले वर्षा हुन्छ। जसले गर्दा यहाँका माटोका छानो भएका घर मासिन थालेका छन्।

परम्परा तथा मौलिकता झल्कने गरी रैथाने सीप, ज्ञान र प्रविधिको प्रयोगबाट बनाइएका घरको छत नै माटोका राखिन्थ्यो। माटो जमाएर बनाइएका घर जलवायु परिवर्तनको चेपुवामा परेर कंक्रिटले बन्न थालेका छन्। वर्षायाम लागेसँगै माटोका घरमा बस्नेहरू त्रासैत्रासमा रहने गरेका छन्।

विगतको तुलनामा मनाङमा औसतभन्दा अधिक वर्षा र लगातार झरी पर्न थालेपछि माटोले बनाइएका परम्परागत घरको छतले धान्न सक्ने अवस्था छैन। जसले गर्दा यहाँका घर पानीले भिजेर चुहिन थालेका छन्। पहिले माथिल्लो मनाङमा वर्षा नै हुँदैनथ्यो। अहिले विशेष गरी नार्पाभूमि गाउँपालिकाका नार र फुमा माटोबाट निर्मित पुरातन सांस्कृतिक शैलीका घर वर्षाका कारण नासिँदै गएको गाउँपालिकाका अध्यक्ष कोञ्जो तेन्जिङ लामाले बताए। 

“प्रकृतिसँग जुध्न सकिँदैन। प्रकृतिलाई फेर्न पनि सकिँदैन। जलवायु परिवर्तनले प्रत्यक्ष रूपमा प्रभाव पारेको देखिन्छ। परम्परागत तथा मौलिकता नै मासिने अवस्थामा पुगेको छ। यसका साथै परम्परागत संस्कृतिलाई समेत असर गरेको महसुस हुन्छ”, उनले भने। विगतमा माथिल्लो मनाङमा वर्षा नहुने हुँदा यस्ता घर नै पहिचान बनेकामा अहिले फेरिँदै गएको उनको भनाइ छ । 

सदरमुकाम चामेमा पुराना परम्परागत घर देखिन छाडेका छन्। विकासको क्रमसँगै आधुनिकताले छोप्दै जाँदा नासोँ तथा चामे गाउँपालिकामा अधिकांश घर आरसिसी गरी निर्माण भएका पाइन्छन्। तर, मनाङ ङिस्याङ गाउँपालिका र नार्पाभूमि गाउँपालिकामा भने पुरातन शैलीका सांस्कृतिक सम्पदा अझै पनि देख्न सकिन्छ।

आफ्ना सन्ततिका लागि पूर्वजले बनाएका ऐतिहासिक सम्पदा, स्मारक, गुम्बा, छोर्तेन तथा देवस्थलको अस्तित्व नासिँदै जान थालेका छन्। एकातिर जलवायु परिवर्तनको प्रभावले घट्दो हिमपात, बढ्दो तापक्रम र वर्षाले मानिस तथा पशु चौपायाको स्वास्थ्य, सामाजिक, सांस्कृतिक धरो नासिने, रैथाने सीप, पहिचान तथा ज्ञान नासिने गरेको छ भने अर्कोतर्फ जैविक विविधता र पारिस्थितिकीय प्रणालीमा हानि पुर्‍याउने गरेको छ। हिउँ र पानी कम पर्ने चक्र फेरिएपछि हिमाली जीवनशैली र संस्कृतिमा पनि असर परेको अध्यक्ष लामाले बताए। पर्यावरणीय प्रभावका कारण जीवनयापन, वातावरणीय अवस्था तथा आर्थिक–सामाजिक–सांस्कृतिक अवस्थामा फेरबदल हुँदै गएको छ।

“पर्यटकको ‘हब’ का रूपमा परिचित मनाङमा आउने विदेशी पर्यटक तिलिचो जान मात्रै आउँदैनन् । उनीहरू यहाँको जीवनशैलीको अध्ययन गर्न पनि आउँछन्, हामीले गुम्बा, छार्तेन, माटोका घरलगायत मौलिक पहिचान बनेको मनाङवासीको संस्कृति संरक्षण गर्नुपर्छ”, नार्पाभूमिका अध्यक्ष लामाले भने। 

उनले नार्पाजातिको संस्कृति, रीतिरिवाज संरक्षण गर्न प्रतिबद्ध रहेको बताए। नार्पाभूमिमा गाउँ छाड्दा साइत हेरेर मात्र निस्किने तथा छोर्तेन घुमेर गाउँ छिर्ने चलन अहिले पनि जीवन्त रहेको छ। गाउँको प्रवेशद्वारका रूपमा अहिले पनि छोर्तेन देख्न पाइन्छ। यी परम्परागत गुम्बा, छोर्तेन यहाँका सांस्कृतिक सम्पत्ति हुन्। संरक्षणको अभावमा यहाँका गुम्बा, छोर्तेन तथा माटोका घरको छानो चुहिएर दलिन, खम्बा र निदाल कुहिएर मक्किएका छन्।

चामे गाउँपालिकाका अध्यक्ष लोकेन्द्रबहादुर घलेले अधिक वर्षा हुँदा यहाँका बासिन्दा कंक्रिटका घर बनाउन बाध्य भएका बताए। “विगतमा जस्तो पानीको आवश्यकता हिउँले पूरा गर्दैन। भारी वर्षा हुन्छ। जसले चिसो ठाउँ भएकाले वर्षाबाट बच्न माटोको घर फेर्न बाध्य भएका छौँ,” उनले भने, “चामे–५ मा केही परम्परागत मौलिक घर थिए। अहिले ती पनि नासिँदै गएका छन्। जति वर्ष फेरिन्छ, त्यति वर्षा बढ्दा समस्या भएको छ।”

माटोको बाक्लो गारो भएको घरभित्र बस्दा जाडोमा न्यानो र गर्मीमा शीतल महसुस हुन्छ। यस्ता घरमा बस्दा जाडोयाममा चिसोजन्य रोगले छुँदैन। तर, आधुनिकता छुँदै गर्दा आरसीसी घर बन्ने क्रम जारी छ। यस्ता घरमा गर्मीमा बढी गर्मी र जाडोमा बढी जाडो हुन्छ। 

विज्ञका अनुसार माटोले बनेका घरले तातो चिसो सोसेर राख्छ। जसले गर्दा जाडोमा न्यानो र गर्मीमा शीतल हुन्छ। यी पुराना सम्पदाको संरक्षणका लागि तीनै तहका साथै सम्बन्धित निकाय सचेत हुन आवश्यक छ। विशेष गरी जलवायु परिवर्तन न्यूनीकरण तथा हरित वृद्धिमा सरकारको चासो दिन सकेमा यहाँको जीवनशैलीलाई मुख्य रूपमा टेवा पुग्नेछ।