कोशी र गण्डकीमा भारी वर्षाको सम्भावना

काठमाडौँ– देशमा पश्चिमी तथा स्थानीय वायुको प्रभाव रहेको छ। साथै बंगालको खाडीबाट आएको जलवाष्पयुक्त हावाको समेत आंशिक प्रभाव रहेको छ। 

भारतको सिक्किम तथा भुटान र बांग्लादेशको पूर्वी भूभागसम्म मनसुनको आगमन भएको मौसम पूर्वानुमान महाशाखाले जनाएको छ। यसै साताको अन्त्यसम्म पूर्वी भूभागबाट नेपाल प्रवेश हुने देखिएको छ।

दिउँसो कोशी, मधेश र गण्डकीसहित देशको पहाडी भूभागमा आंशिकदेखि साधारणतया बदली रहनेछ। कोशी, मधेश, बागमती र गण्डकीका पहाडी भूभागमा मेघगर्जन र चट्याङसहित हल्कादेखि मध्यम वर्षाको सम्भावना छ।

कोशी र गण्डकीका एक-दुई स्थानमा भारी वर्षासमेत हुने महाशाखाले जनाएको छ। कोशी र बागमतीका उच्च-पहाडी तथा हिमाली भूभागमा हल्का वर्षासहित हिमपातको सम्भावना छ। 

यसैगरी, राति कोशी, मधेश, बागमती, गण्डकी र सुदूरपश्चिमका पहाडी भूभागमा आंशिकदेखि साधारणतया बदली रहनेछ। यी प्रदेशमा मेघगर्जन र चट्याङसहित हल्कादेखि मध्यम वर्षाको सम्भावना पनि छ।