१६६ सांसदको समर्थनसहित प्रचण्ड शीतलनिवासमा

काठमाडौँ– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बहुमतको प्रधानमन्त्रीमा दाबी पेस गर्न राष्ट्रपति कार्यालय पुगेका छन्।

दाहाल १६६ सांसदको समर्थन आफूलाई रहेको दाबीसहित शीतलनिवास पुगेका हुन्।

राष्ट्रपति विद्यादेवी भण्डारीले बहुमतको सरकार गठनका लागि संविधानको धारा ७६ को उपधारा २ बमोजिम प्रधानमन्त्रीको नाम प्रस्ताव गर्न दलहरुलाई आह्वान गरेको समयसीमा केही बेरमा सकिँदैछ।

वर्तमान सत्तागठबन्धनबाट प्रधानमन्त्री बन्न अन्तिमसम्म प्रयत्न गरेका दाहाल त्यसबाट पार नलागेपछि अन्तिम घडीमा नेकपा एमाले नेतृत्वको गठबन्धनबाट प्रधानमन्त्री बन्नलागेका हुन्।

आइतबार दिउँसो एमाले अध्यक्ष केपी शर्मा ओलीको बालकोटस्थित निवासमा बसेको एमालेसहितका दलहरुको बैठकले दाहाललाई प्रधानमन्त्रीमा अघि सार्ने निर्णय गरेको हो।

एमाले महासचिव शंकर पोखरेलका अनुसार दाहाललाई प्रतिनिधिसभाका १६६ सांसदको समर्थन छ।

१६६ सांसदमध्ये एमालेका ७८, माओवादी केन्द्रका ३२, राष्ट्रिय स्वतन्त्र पार्टी (रास्वपा)का २०, राष्ट्रिय प्रजातन्त्र पार्टी (राप्रपा)का १४, जनता समाजवादी पार्टी (जसपा)का १२, जनमत पार्टीका ६ र नागरिक उन्मुक्ति पार्टीका ४ सांसद छन्।