सुदूरपश्चिममा किट अभावले कोभिड परीक्षण प्रभावित

कञ्चनपुर– सुदूरपश्चिम प्रदेशमा कोभिड परीक्षण गर्ने किट अभाव भएको छ। गौरीफन्टा र गड्डाचौकी नाकामा भारतबाट नेपाल फर्किनेहरूमा कोभिड संक्रमण देखिन थाले पनि परीक्षण गर्ने किट अभाव हुँदा परीक्षण प्रभावित भएको छ।

सुदूरपश्चिम प्रदेश स्वास्थ्य निर्देशनालयका महामारी सम्पर्क व्यक्ति हेमराज जोशीले सुदूरपश्चिममा कोभिड परीक्षण गर्ने किट अभाव हुँदा नाकामा परीक्षण हुन नसकेको जानकारी दिए। “बुधबार कैलालीको गौरीफन्टा नाकामा भारतबाट आएका तीन जनामा कोभिड संक्रमण पुष्टि भएको छ”, जोशीले भने, “थप परीक्षणका लागि किट अभाव छ, हामीले संघ र प्रदेश सरकारसँग माग गरेका छौँ।” 

बुधबार गौरीफन्टा नाकामा भारतबाट आएका ३६ जनामा कोभिड परीक्षण गर्दा तीन जनामा संक्रमण पुष्टि भएको थियो। निर्देशनालयका अनुसार कोभिड पुष्टि हुनेमा कञ्चनपुरको पुनर्वासका २० वर्षका युवक, अछामको ढकारीका ३२ वर्षीय युवक र कैलालीको धनगढीकी २४ वर्षीया युवती रहेका छन्। कोभिडको परीक्षणका लागि किट नहुँदा अन्य नाकामा परीक्षण हुन सकेको छैन।

कोभिड पुष्टि भएका सबैको पीसीआर परीक्षणका लागि केन्द्रीय जनस्वास्थ्य प्रयोगशाला टेकु काठमाडौँ पठाइएको उनले बताए। “कोभिड पुष्टि भएका तीनै जनाको ‘स्याम्पल’ टेकु पठाएका छौँ, त्यहाँ पीसीआर परीक्षणपछि कोभिडको कुन भेरियन्ट रहेछ भन्ने पत्ता लाग्छ”, जोशीले भने, “छिमेकी मुलुक भारतमा संक्रमण बढिरहेको छ, खुला सिमानाकाका कारण सुदूरपश्चिममा पनि संक्रमणको जोखिम बढेको छ।” 

स्वास्थ्य तथा जनसंख्या मन्त्रालय स्वास्थ्य सेवा विभागले संक्रमणको महामारी निम्तन सक्ने सम्भाव्यतालाई मध्यनजर गर्दै मातहतका कार्यालय, अस्पताल र प्रयोगशाला तयारी अवस्थामा रहन निर्देशन दिएको छ। तर, नाकामा परीक्षणका लागि किट नहुँदा परीक्षण हुन नसकेको स्वास्थ्य कार्यालयको भनाइ छ। जिल्ला स्वास्थ्य कार्यालय कञ्चनपुरका प्रमुख ओमप्रकाश जोशीले कोभिड परीक्षणका लागि किट अभाव रहेको जानकारी दिए।

“गड्डाचौकी नाकाबाट नेपाल आउनेको संख्या बढेको छ, नाकामा रहेको रहेको हेल्थ डेस्कबाट समेत कोभिड परीक्षणको किट माग भएको छ”, उनले भने, “हामीसँग किट छैन, हामीले माथिल्लो निकायमा माग गरेका छौँ।” कैलालीको गौरीफन्टा र कञ्चनपुरको गड्डाचौकी भारतसँग जोडिएका प्रमुख नाका हुन्।

नाकामा हेल्थ डेस्क रहेको भए पनि कोभिड परीक्षणका लागि किट नहुँदा परीक्षण हुन सकेको छैन। महेन्द्रनगरस्थित महाकाली प्रादेशिक अस्पताल कोभिडको लक्षण देखिएका बिरामी आउने गरे पनि परीक्षण किट अभाव हुँदा परीक्षण हुन नसकेको अस्पतालका सूचना अधिकारी शान्तप्रसाद जोशीले जानकारी दिए।