सोलार फेन्सिङ बिग्रिएसँगै हुल बाँधेर आउन थाले बाहुनडाँगीमा हात्ती

झापा– मेचीनगर–४ बाहुनडाँगीका बासिन्दा दैनिक भारतबाट हुल बाँधेर आउने जंगली हात्तीबाट फेरि आजित बन्न थालेका छन्।

साँझ नपर्दै मेची नदी पार गरेर आउने ५० देखि ६० वटा हात्तीका समूहले किसानले लगाएको अन्नबाली नष्ट गर्न थालेपछि उनीहरू आजित बनेका हुन्।

बिहानै मेची नदी किनारमा पुग्ने गरेका स्थानीय शंकर लुइँटेलले दैनिक बाहुनडाँगी आउने र भारततर्फ फर्कने हात्तीको हुलको तस्वीर, भिडियो सामाजिक सञ्जालमा पोस्ट गर्दै आएका छन्।

हात्तीले किसानले बारीमा लगाएको मकै, सुपारी, केरालगायतका खाद्यान्न बाली खाएर नष्ट गर्दै आएको उनले बताए। “बर्षौं लगाएर हात्तीले नखाने नगदे बाली सुपारीको बोट हुर्काएँ,” उनले भने, “फल्न शुरू भएको थियो सबै भाँचेर नष्ट गरिदियो।”

उनले विश्व बैंकको सहयोगमा १० वर्षअघि मेची नदी किनारमा गरिएको सोलार फेन्सिङ बिग्रिएपछि हात्ती फेरि बाहुनडाँगीमा हुल बाँधेर आउन शुरू गरेको बताए। सोलार फेन्सिङ मर्मतमा सम्बन्धित निकायले चासो नदिएको उनको गुनासो छ। 

सोको रेखदेखको जिम्मेवारी पाएको मानव–हात्ती द्वन्द्व व्यवस्थापन तथा वातावरण संरक्षण मञ्चका अध्यक्ष निरोज घिमिरेले हाल सोलार फेन्सिङको मर्मत भइरहेको बताए। उनले डिभिजन वन कार्यालय झापाबाट झारपात फाँड्नका लागि चालु आर्थिक वर्ष २०८१/८२ मा आठ लाख रुपैयाँ प्राप्त भएको र मेचीनगर नगरपालिकाद्वारा कर्मचारीको पारिश्रमिकका लागि सात लाख रुपैयाँ बजेट प्राप्त भएको बताए। 

सोलार फेन्सिङको हेरचाहका लागि मासिक पाँच हजारका दरले तलब दिएर १० जना र १२ हजारका दरले तलब दिएर दुई जना प्राविधिक संस्थामार्फत राखिएको बताए। पछिल्लो समय हात्ती आतंक बढ्यो भनेर स्थानीयले समाधानको मागसहित मेचीनगर नगरपालिकामा ज्ञापनपत्रसमेत बुझाएका छन्। 

डिभिजन वन कार्यालय झापाका प्रमुख भरतबाबु श्रेष्ठले सोलार फेन्सिङ प्राकृतिक र हात्तीका कारण नभई मान्छेले भत्काउने गरेको बताए। विगत १० वर्षयता बाहुनडाँगीमा यही सोलार फेन्सिङका कारण जंगली हात्ती आउने क्रम घटेको थियो।