बेलायत र क्यानडा पठाइदिन्छु भन्दै ११ करोड ठगी आरोपमा ३ जना पक्राउ

काठमाडौँ– बेलायत र क्यानडा पठाइदिन्छु भन्दै रकम ठगी गरेको आरोपमा तीन जनालाई प्रहरीले पक्राउ गरेको छ।

पक्राउ पर्नेमा भक्तपुर नगरपालिका-२ का रवीन्द्र वासुकला, मोरङ रतुवामाई नगरपालिका-१० का लक्ष्मण पराजुली र धनुषा सबैला नगरपालिका-१२ घर भएका अरुणराज शर्मा रहेका छन्। 

पक्राउ परेकामध्ये रवीन्द्रले क्यानडा पठाइदिन्छु भन्दै एक जना पीडितबाट ५ लाख ६० हजार रुपैयाँ तथा लक्ष्मण र अरुणले बेलायत पठाउने भन्दै ३८ जना पीडितबाट ११ करोड ६ लाख ९७ हजार रूपै याँ लिई सम्पर्कविहीन भएका थिए। 

रवीन्द्रलाई भक्तपुर नगरपालिका-२ ब्यासीबाट सोमबार तथा लक्ष्मण र अरुणलाई काठमाडौँ महानगरपालिका-३२ नरेफाँटबाट आइतबार पक्राउ गरिएको काठमाडौँ उपत्यका अपराध अनुसन्धान कार्यालयले जनाएको छ। 

उनीहरूलाई आवश्यक अनुसन्धान तथा कारबाहीको लागि वैदेशिक रोजगार विभाग ताहाचल पठाइएको छ।