भारतद्वारा आफ्ना नागरिकलाई तेहरान छोड्न चेतावनी जारी

इजरायल र इरानबीच तनाव बढ्दै गएपछि भारतले आफ्ना नागरिकलाई तेहरान छोड्न आग्रह गरेको छ। इरानमा इजरायली बमबारीको सम्भावना बढेको र केही भारतीय नागरिकले इरानको सीमा पार गरिसकेको अवस्थामा यो चेतावनी जारी गरिएको हो।

इजरायल–इरानबीच आक्रमण प्रत्याक्रमण चार दिनयता जारी छ। इजरायले इरानमाथि आफ्नो आक्रमण जारी राख्ने प्रतिबद्धता जनाएसँगै भारत सरकारले यो कदम चालेको हो।

विदेश मन्त्रालयले एक विज्ञप्ति जारी गर्दै, “यातायातमा आत्मनिर्भर रहेका बासिन्दालाई पनि विकसित भइरहेको परिस्थितिलाई ध्यानमा राख्दै शहरबाट बाहिर जान सल्लाह दिइएको छ,” भनेको छ।

यो चेतावनी इजरायलको सहयोगी अमेरिकी राष्ट्रपति डोनाल्ड ट्रम्पले ‘सबैले’ तत्काल ‘इरानी राजधानी छोड्नुपर्ने’ बताएको केही समयपछि आएको हो। तेहरानको जनसंख्या करिब एक करोड छ।

भारतीय विदेश मन्त्रालयले तेहरानबाट सयौँ किलोमिटर उत्तरपश्चिममा ‘केही भारतीयलाई आर्मेनियासँगको सीमा हुँदै इरान छोड्न सहयोग गरिएको’ जानकारी दिएको छ।

यद्यपि, विदेश मन्त्रालयले इरानमा कति जना भारतीय नागरिक प्रभावित भएका छन् भन्ने विवरण भने दिएको छैन। गत वर्षको सरकारी तथ्यांकअनुसार इरानमा करिब १० हजार भारतीय बसोबास गर्दै आएका थिए।

यसअघि, हजारौँ भारतीय नागरिक रहेको इजरायलमा पनि नयाँ दिल्लीले आफ्ना नागरिकलाई ‘सतर्क रहन’ चेतावनी जारी गरिसकेको छ।