धानचामल आयातमा १७.८२ अर्बको वृद्धि

काठमाडौँ– नेपालमा धानचामल आयातमा गत वर्षको तुलनामा उल्लेख्य वृद्धि भएको छ। कृषि तथा पशुपन्छी विकास मन्त्रालयको तथ्यांकअनुसार, चालु आर्थिक वर्षको जेठ मसान्तसम्म ३८ अर्ब ९४ करोड रुपैयाँ बराबरको धानचामल आयात भएको छ। यो गत वर्षको तुलनामा करिब १७ अर्ब ८२ करोड रुपैयाँले बढी हो। गत आर्थिक वर्षको सोही अवधिमा यो अंक २१ अर्ब १२ करोड रुपैयाँ मात्र थियो।

मन्त्रालयका सूचना अधिकारी महानन्द जोशीका अनुसार, प्रत्येक महिना औसत तीन अर्ब रुपैयाँभन्दा धेरैको धानचामलको आयात बढेकाले असार मसान्तसम्म थप तीन अर्ब मूल्यको आयात हुने अनुमान छ। आयात वृद्धिको प्रमुख कारणमा भारत सरकारले आफ्ना उद्योगीलाई निर्यातमा लगाएको कर घटाउनु र तीन वर्षदेखि 'बफर स्टक'मा रहेको धानचामल तुलनात्मक रूपमा सस्तोमा पाइनु रहेका छन्।

चालु आर्थिक वर्षको ११ महिनामा मात्र १७ अर्ब ७८ करोड रुपैयाँ बराबरको चामल आयात भएको छ, जबकि गत वर्ष सो अवधिमा १२ अर्ब ४३ करोड रुपैयाँको चामल आयात भएको थियो। यसरी बाह्य मुलुकबाट वस्तुको आयात वृद्धि हुँदा नेपालको व्यापार घाटा थप नकारात्मक हुने अनुमान गरिएको छ।

मन्त्रालयका सूचना अधिकारी जोशीका अनुसार सामान्यतया देशमा वार्षिक करिब ७० लाख मेट्रिक टन धानको माग रहेकामा करिब ६० लाख मेट्रिक टन धान स्वदेशी उत्पादन हुने गरेको छ। करिब १० लाख मेट्रिक टन धान अपुग हुने गरेकाले आपूर्ति सहज बनाउन आयात गर्नुपर्ने बाध्यता छ।

कृषि उत्पादनमा वृद्धि गरी आयात प्रतिस्थापन गर्नका लागि किसानलाई समयमै मल, बीउ, सिँचाइ सुविधा, र अनुदानको व्यवस्था गर्नुपर्ने आवश्यकता विज्ञहरूले औँल्याएका छन्। यसका साथै, कृषि क्षेत्रमा नीतिगत सुधार अपरिहार्य रहेको जानकारहरूको भनाइ छ।