काभ्रेको नालामा पुल भाँचिदा काठमाडौँ जोड्ने वैकल्पिक सडक अवरुद्ध

काभ्रेपलान्चोक– काभ्रेपलान्चोकको बनेपा नगरपालिका–४ र १ को सीमास्थलमा रहेको पुल भाँचिएपछि यातायात अवरुद्ध भएको छ। 

काभ्रेपलान्चोकको नाला र भक्तपुरको च्यामासिङ सडकखण्डअन्तर्गत पर्ने उक्त सडक पूर्वतर्फबाट राजधानी काठमाडौँ जाने वैकल्पिक मार्गका रूपमा प्रयोग हुँदै आएको थियो। 

स्थानीय शान्तलाल श्रेष्ठका अनुसार शनिबार बिहान सबेरै मालवाहक गाडी पार गरेलगत्तै ४५ वर्षअघि निर्माण भएको उक्त पुल भाँचिएको हो। पुल भाँचिएपछि उक्त सडकखण्ड अवरुद्ध भएको हो। 

अरनिको राजमार्गअन्तर्गत भक्तपुरको सूर्यविनायकदेखि काभ्रेपलान्चोकको धुलिखेलसम्मको सडक विस्तार भइरहेकाले विगत दुई वर्षदेखि राजमार्गमा गुड्ने अधिकांश सवारी नाला–च्यामासिङ सडकखण्ड प्रयोग गर्दै आइरहेका थिए। 

भक्तपुरबाट उक्त सडकखण्डमा सवारी नपठाउन भनिएको र बनेपाबाट राजधानीतर्फ जाने सवारी बनेपामा रोकिएको जिल्ला ट्राफिक कार्यालय बनेपाले जनाएको छ। 

कार्यालय प्रमुख प्रहरी निरीक्षक सुनिल धाँजूले उक्त सडकखण्ड अस्थायी रूपमा सञ्चालन गर्न सडक विभाग र स्थानीय तहसँग समन्वय भइरहेको जानकारी दिए।