टेक्सासमा बाढीका कारण २५ जनाको मृत्यु, २३ बालिका सम्पर्कविहीन

अमेरिकाको टेक्सास राज्यको दक्षिण–मध्य क्षेत्रमा शुक्रबार बिहान अचानक आएको बाढीले ठूलो मानवीय क्षति पुर्‍याएको छ। स्थानीय अधिकारीहरूले दिएको जानकारीअनुसार, अहिलेसम्म २४ जनाको मृत्यु भइसकेको छ।

ग्वाडालुपे नदीको किनारमा रहेको एक ग्रीष्मकालीन बाल शिविरमा सहभागी भएका २३ भन्दा बढी बालिका अझै सम्पर्कमा आउन सकेका छैनन्। केर जिल्लाका शेरिफ ल्यारी लाइथाले पत्रकार सम्मेलनमार्फत जनाएअनुसार, थप व्यक्तिहरू हराइरहेका हुन सक्ने भएकाले मृतकको संख्या अझ बढ्न सक्ने सम्भावना छ।

टेक्सास राज्यका उपराज्य प्रमुख ड्यान प्याट्रिकले दिएको जानकारीअनुसार, मृत्यु हुनेहरूमा केही बालबालिका पनि छन्। उनले ग्वाडालुपे नदीको पानीको सतह एकाएक २६ फिट (करिब ८ मिटर) ले बढेपछि शिविरमा सहभागी करिब ७५० बालिकामध्ये २३ जति अझै सम्पर्कविहीन भएको बताए।

शिविरका प्रमुखले पठाएको सन्देशमा बाढीका कारण त्यहाँ पानी, विद्युत् तथा सञ्चार सेवा पूर्णरूपमा अवरुद्ध भएको उल्लेख छ।

हाल बाढी प्रभावित क्षेत्रमा ठूलो संख्यामा उद्धारकर्मी परिचालन गरिएको छ। सयौँ सुरक्षाकर्मी तथा दर्जनौँ उड्ने साधनको माध्यमबाट उद्धार कार्य जारी छ र उद्धार टोली रातदिन खटिएका छन्।

धेरै सडक अवरुद्ध रहेको उल्लेख गर्दै स्थानीय प्रशासनले बाढी प्रभावित क्षेत्रमा नजान सबै नागरिकलाई अनुरोध गरेको छ। विज्ञका अनुसार हालैका वर्षमा जलवायु परिवर्तनका कारण अत्यधिक वर्षा, बाढी, खडेरी, आँधी र गर्मीका लहर बारम्बार र बढी तीव्र रूपमा देखिन थालेका छन्।