रसुवा बाढीको कारण पत्ता लगाउन भूउपग्रह तस्वीर अध्ययन गर्दै मौसम विभाग

काठमाडौँ– जल तथा मौसम विज्ञान विभागको बाढी पूर्वानुमान महाशाखाले रसुवा (भोटेकोशी)मा आएको बाढीको कारण पत्ता लगाउन अध्ययन शुरू गरेको जनाएको छ।

बाढी पूर्वानुमान महाशाखा प्रमुख विनोद पराजुलीले भोटेकोशी जलाधारको तिब्बती क्षेत्रमा थुप्रै हिमताल रहेको उल्लेख गर्दै बाढीको सम्भावित कारण र नदी किनारमा कस्तो असर गरेको छ भनेर पत्ता लगाउन भूउपग्रहका तस्वीरको अध्ययन प्रक्रिया शुरू गरिएको जानकारी दिए।

उनले जल तथा मौसम केन्द्रहरूले दिएको विवरण र प्रारम्भिक अवलोकनका आधारमा भोटेकोशीको बाढी ठूलो पानी परेका कारण आएको भन्ने नदेखिने दाबी गरे।

“नेपालका चीन नजिकै रहेको क्यान्जिङ मौसम केन्द्र र धुन्चेमा भएको केन्द्रले त्यहाँ फाटफुट पानी परेको देखाएको छ। पाल्पामा रहेको मौसमी राडारले रसुवाको सीमावर्ती क्षेत्रमा पानी परेको देखाएको छैन,” उनले भने, “विश्व मौसम संगठनको गाइडेन्स सिस्टमको भूउपग्रहमा आधारित वर्षा अनुमानका अनुसार पनि भोटेकोशी जलाधार क्षेत्रमा पछिल्लो २४ घण्टामा पानी नपरेकोलगायत कारणले वर्षाका कारण बाढी आएको भन्ने देखिँदैन।”

आज बिहान ३ बजेतिर तिब्बतबाट भोटेकोशी नदीमा एक्कासि बाढी पसेको थियो। पानीको सतह रसुवाको टिमुरेमा साढे तीन मिटर बढेको देखिएको पनि उनले बताए।

रसुवामा भोटेकोशी र त्रिशूली नदी किनारमा ठूलो प्रभाव परेको, नुवाकोटमा मध्यम र धादिङको बेनीघाटसम्म सामान्य प्रभाव परेको पनि उनले जानकारी दिए। बाढी घट्दो क्रममा रहे पनि सावधानी अपनाउन उनले सबैमा अनुरोध गरे।

उक्त बाढीका कारण हालसम्म मालवाहक गाडीसहित ६४ वटा सवारीसाधन बगाएको छ। ५५ जनालाई उद्धार गरी सुरक्षित स्थानमा सारिएको छ। सात जनाको मृत्यु भएको छ भने २० जना बेपत्ता रहेका छन्।