२४ घण्टामा ७० विपद् घटना: ४ जनाको मृत्यु, ६ बेपत्ता

काठमाडौँ– विगत २४ घण्टामा देशभर भएका विभिन्न ७० वटा विपद् सम्बन्धी घटनाहरूमा चार जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले दिएको जानकारीअनुसार, यी घटनाहरूमा ६ जना बेपत्ता भएका छन् भने ६ जना घाइते भएका छन्।

असार २५ गते बिहान १० बजेदेखि असार २६ गते बिहान १० बजेसम्मको अवधिमा सबैभन्दा धेरै बाढी र पहिरोका घटना दर्ता भएका छन्। बाढीका कारण एक जनाको मृत्यु भएको छ, पाँच जना बेपत्ता भएका छन् र पाँच जना घाइते भएका छन्। त्यसैगरी, पहिरोका कारण एक जनाको मृत्यु भएको छ, एक जना बेपत्ता भएका छन् र एक जना घाइते भएका छन्।

प्राधिकरणका अनुसार, चट्याङ लागेर दुई जनाले ज्यान गुमाएका छन्। यसबाहेक, आगलागी र जनावरको आक्रमणजस्ता अन्य घटनाहरू पनि यस अवधिमा रिपोर्ट भएका छन्। विपद्का कारण नौ वटा चौपाया मरेका छन् भने करिब ३८ लाख ३७ हजार ४०० रुपैयाँ बराबरको सम्पत्ति नोक्सानी भएको अनुमान गरिएको छ।

विपद्को सामना तथा उद्धार कार्यका लागि यस अवधिमा प्रहरी र उद्धार टोलीहरू गरी कुल ४९८ जना परिचालित भएका थिए।