गाजामा मानवीय सहायता वितरणका क्रममा ८०० जनाको मृत्यु: राष्ट्रसंघ

संयुक्त राष्ट्रसंघले गाजामा मानवीय सहायता प्राप्त गर्ने क्रममा मे महिनाको अन्तिम सातादेखि हालसम्म करिब ८०० जनाको ज्यान गएको जनाएको छ। राष्ट्रसंघको मानव अधिकार कार्यालयका प्रवक्ता रविना शमदासानीका अनुसार, अधिकांशको मृत्यु अमेरिका र इजरायलको समर्थनमा सञ्चालित गाजा मानव सहायता प्रतिष्ठानका वितरण केन्द्रनजिकै भएको हो।

शमदासानीले जेनेभामा पत्रकारलाई जानकारी दिँदै भनिन्, “मे २७ देखि जुलाई ७ सम्मको अवधिमा हामीले गाजा मानव सहायता प्रतिष्ठानका केन्द्रहरूसँग नजिकै ६१५ जनाको मृत्यु भएको अभिलेख गरेका छौँ।”

उनका अनुसार, अझ १८३ जनाको मृत्यु सम्भवतः सहायता सामग्री बोकेका सवारीसाधनहरूको मार्गमा भएको अनुमान गरिएको छ। यसरी कुल झन्डै ८०० जना नागरिकले सहयोग लिन खोज्दा ज्यान गुमाउन बाध्य भएका छन्।

गत मे २६ मा सेवा शुरू गरेको गाजा मानव सहायता प्रतिष्ठान एउटा निजी प्रयोजनको संस्था हो। यसअघि इजरायलले दुई महिनासम्म गाजामा खाद्य तथा अन्य सामग्रीको आपूर्ति रोक्दा गम्भीर भोकमरीको खतरा बढेको थियो।

राष्ट्रसंघका अनुसार, यस प्रतिष्ठानको कामका कारण गाजा क्षेत्रमा राष्ट्रसंघको व्यापक सहायता वितरण प्रणाली लगभग निष्क्रिय भएको छ। सहायता लिन लामबद्ध भएका मानिसमाथि प्रायजसो इजरायली सुरक्षाकर्मीले गोली चलाएको घटना पनि देखिएका छन्।

यता, गाजा मानव सहायता प्रतिष्ठानले भने आफ्ना वितरण केन्द्रसँगै मृत्यु हुने घटना भएको कुरा अस्वीकार गरेको छ। बिहीबार जारी विज्ञप्तिमा प्रतिष्ठानले हालसम्म ‘६ करोड ९० लाखभन्दा बढी खाद्य सामग्री वितरण गरिएको’ उल्लेख गरेको छ।