पूर्णिमाको ह्याट्रिकमा भुटानमाथि नेपालको सहज जित

काठमाडौँ– पूर्णिमा राईको ह्याट्रिकमा नेपालले भुटानलाई पराजित गर्दै साफ यू२० महिला च्याम्पियनसिप फुटबलको आफ्नो उद्घाटन खेलमा सुखद शुरूआत गरेको छ। बांग्लादेशको राजधानी ढाकास्थित बसुन्धारा किङ्स एरेनामा शुक्रबार भएको खेलमा नेपालले भुटानमाथि ६-१ गोलको जित निकाल्दै प्रतियोगितामा सुखद शुरू गरेको हो।

नेपालको जितमा पूर्णिमाले चार गोल गरिन् भने सेनु परियारले दुई गोल गरिन्। यो जितसँगै नेपालले तीन अंक बटुलेको छ। यता भुटानका लागि केल्देन वाङ्गमोले सान्त्वना गोल फर्काइन्। खेलको नवौँ मिनेटमा सेनुले गोल गर्दै नेपाललाई सुरुवाती अग्रता दिलाइन हुन्। खेलको १८औँ मिनेटमा पूर्णिमाले नेपालको अग्रता दोब्बर बनाइन्। त्यसपछि खेलको ४५औँ मिनेटमा सेनुले व्यक्तिगत दोस्रो र टोलीका लागि तेस्रो गोल गरिन्। 

त्योसँगै नेपालले खेलको पहिलो हाफमा ३-० को अग्रता लिएको थियो। त्यसैगरी खेलको ५४औँ मिनेटमा भुटानले एक गोल फर्कायो। भुटानका लागि  केल्देनले गोल गरिन्। खेलको ६३औँ मिनेटमा पूर्णिमाले गोल गर्दै नेपालको अग्रता ४-० मा पुर्‍याइन्। खेलको ८४औँ मिनेटमा पूर्णिमाले ह्याट्रिक पूरा गरिन्। 

त्यसपछि खेलको ८८औँ मिनेटमा पूर्णिमाले आफ्नो चौथो गोल गर्दै नेपाललाई ६-१ को अवस्थामा ल्याइन्। त्यसपछि खेलमा गोल हुन सकेन र नेपालले भुटानमाथि ६-१ को जित निकाल्यो। सोही प्रतियोगिताअन्तर्गत आजै भएको उद्घाटन खेलमा घरेलु टोली बांग्लादेशले श्रीलंकालाई ९-० को फराकिलो अन्तरले हराउँदै विजयी भएको थियो।