के छ एयर इन्डिया विमान दुर्घटनाबारेको प्रारम्भिक प्रतिवेदनमा?

गत जुन १२ मा भारतको अहमदाबादबाट बेलायतका लागि उडेको एयर इन्डियाको यात्रुवाहक विमान दुर्घटनामा २६० जनाको ज्यान गएको प्रारम्भिक अनुसन्धान प्रतिवेदनले जनाएको छ।

भारतको विमान दुर्घटना अनुसन्धान विभाग (एएआईबी) द्वारा सार्वजनिक गरिएको प्रतिवेदनअनुसार, दुर्घटना हुनु केही क्षणअघि विमानका दुवै इन्जिनमा इन्धन आपूर्ति रोकिएको पुष्टि भएको छ।

प्रतिवेदनअनुसार, विमानले उडानपछि अधिकतम गति लिएको केही सेकेन्डमै इन्जिन–१ र इन्जिन–२ का इन्धन नियन्त्रण स्विच ‘सञ्चालन’बाट ‘बन्द’ स्थितिमा क्रमशः एक सेकेन्डको अन्तरमा सारिएका थिए। 

ककपिटमा रेकर्ड गरिएको कुराकानीमा एक पाइलटले अर्का पाइलटलाई सोधेका छन्, “तपाईंले इन्धन किन बन्द गर्नुभयो?” जवाफमा अर्का पाइलटले “मैले बन्द गरेको होइन” भनेका छन्। त्यसको केहीबेरमै विमान जमिनमा खसेको प्रतिवेदनमा उल्लेख छ।

दुर्घटनापछि इन्धन आपूर्ति पुनः शुरू भएको र इन्जिन सञ्चालनमा आउने संकेत देखिए पनि पाइलटले ‘आपतकालीन सन्देश’ पठाइसकेका थिए। त्यसपछि विमान पूर्ण रूपमा नियन्त्रणबाहिर गएको थियो।

प्रतिवेदनले विमान निर्माता तथा इन्जिन निर्माता कम्पनीका तर्फबाट कुनै प्राविधिक कमजोरी नदेखिएको जनाएको छ। साथै, विमान सञ्चालनसम्बन्धी सम्पूर्ण निर्देशन पालना गरिएको पनि उल्लेख छ। 

सन् २०१८ मा संयुक्त राज्य विमान नियामक निकायले इन्धन नियन्त्रण प्रणालीमा लक गर्ने प्रविधि असफल हुन सक्ने विषयमा जानकारी दिएको भए पनि, यो बाध्यकारी निर्देशन नभएको भन्दै एयर इन्डियाले सो सुझावअनुसार निरीक्षण नगरेको जनाएको छ।

यो दुर्घटनामा एक जना बेलायती नागरिक मात्र जीवित रहेका छन्, जो विमान खसेपछि केही दूरी हिँडेर सुरक्षित स्थानमा पुगेका थिए र अहिले स्वास्थ्य संस्थाबाट घर फर्किसकेका छन्।

विमानमा २३० जना यात्रु र १२ जना चालक दलका सदस्य रहेका थिए। दुर्घटनाका कारण जमिनमा रहेका १९ जनाको पनि ज्यान गएको छ भने केही घाइते भएका छन्।

दुर्घटनाको पूर्ण कारण पत्ता लगाउन अन्तर्राष्ट्रिय विज्ञ, विमान निर्माता कम्पनी, इन्जिन निर्माता तथा सम्बन्धित निकायहरू मिलेर अनुसन्धान गरिरहेका छन्। एयर इन्डियाले अनुसन्धानमा पूर्ण सहयोग गरिरहेको जनाएको छ।