प्रतिनिधिसभामा मन्त्रीका सम्बन्धमा उठेका प्रश्नको जवाफ दिन सरकारको ध्यानाकर्षण

काठमाडौँ– प्रतिनिधिसभाको आइतबारको बैठकमा सांसदहरूले समसामयिक विषयमा सरकारको ध्यानाकर्षण गराएका छन्। सांसदहरूले सरकारका मन्त्रीहरूमाथि लागेका घुसको आरोपको जवाफ दिन र दोषीमाथि कारबाही गर्न, हुलाकी राजमार्गको देखिएको ढिलासुस्तीका साथै महिलाको छाउगोठमा मृत्यु भएको घटनाबारे सरकारको ध्यानाकर्षण गराएका हुन्।

नेकपा एकीकृत समाजवादीका सांसद राजेन्द्र पाण्डेले सरकारका मन्त्रीहरूले घुस लिएको विषय सार्वजनिक प्रचारमा आएको भन्दै दोषीमाथि कारबाहीको माग गरे। संघीय मामिला तथा सामान्य प्रशासनमन्त्री र भूमि व्यवस्था, सहकारी तथा गरिबी निवारणमन्त्रीमाथि प्रश्न उठेकाले सरकारले तत्काल जवाफ दिनुपर्ने उनको धारणा थियो।

कम्पनी रजिस्ट्रार कार्यालयमा भइरहेको ढिलासुस्तीप्रति ध्यानाकर्षण गराउँदै सांसद पाण्डेले कर्मचारीबाट भइरहेको सेवाग्राहीको हित विपरीतको गतिविधि तत्काल बन्द गर्न र जरिबाना छुटको प्रबन्ध गर्न आग्रह गरे।

जनता समाजवादी पार्टीका सांसद सुशीला श्रेष्ठले झापाको झापा गाउँपालिकामा अवस्थित लसुना नाकालाई थप व्यवस्थित गर्न भन्सार कार्यालय स्थापना गरी राजस्व संकलनलाई प्रभावकारी बनाउन र भौतिक पूर्वाधारको यथोचित संरक्षण गर्न माग गरिन्।

जनमत पार्टीका सांसद अब्दुल खाँनले रसुवागढीमा काम गर्न गएका बर्दियाका नागरिक बाढीमा परी बेपत्ता भएको उल्लेख गर्दै उनीहरूको खोज गरी पीडित परिवारलाई राहत उपलब्ध गराउन आग्रह गरे। उनले बाढीपहिरोका कारण नेपाल–चीन सीमामा रहेको मितेरी पुल बगेको, दर्जनौँ सवारीसाधन बगाएको तथा जनधनको क्षति भएको भन्दै तत्काल पुनर्निर्माणको काम गर्न सरकारको ध्यानाकर्षण गराए।

जनता समाजवादी पार्टी, नेपालका सांसद रेखा यादवले तराई–मधेशका विभिन्न जिल्लामा खानेपानीको समस्या विकराल बन्दै गएकाले यथोचित प्रबन्ध गर्न सरकारको ध्यानाकर्षण गराइन्।

लोकतान्त्रिक समाजवादी पार्टीका सांसद रामप्रकाश चौधरीले तराई–मधेसलाई जलसंकट क्षेत्र घोषणा गर्न माग गरे। उनले पर्याप्त वर्षा नहुँदा सिँचाइ नहरबाहेकका क्षेत्रमा रोपाइँ हुन नसकेको बताए।

नेपाल मजदुर किसान पार्टीका सांसद प्रेम सुवालले चालु आर्थिक वर्षको पुँजीगत खर्च न्यून हुनु दुःखद रहेको धारणा राखे। मुलुकमा व्यापार घाटा चुलिँदै गएको, दाल, चामल, खाद्य पदार्थसमेत विदेशबाट आयात गरिँदा घाटाको ग्राफ बढेको उनको भनाइ छ।

राष्ट्रिय जनमोर्चा पार्टीका सांसद चित्रबहादुर केसीले सरकारमा बस्नेहरूले देश र जनताको हितमा काम नगर्दा व्यवस्थाका विरुद्ध आवाज उठ्ने गरेको तर्क गरे। उनले सरकार प्रमुख र मन्त्रीले सम्पत्ति विवरण सार्वजनिक नगरेकामा आपत्ति प्रकट गरे।

आमजनता पार्टीका सांसद प्रभु साहले काठमाडौँका विभिन्न स्थानमा बसोबास गर्ने सुकुम्बासी बस्तीमा खानेपानीको उपलब्धता हुन नसकेकाप्रति सरकारको ध्यानाकर्षण गराए। उनले तराई–मधेशमा खानेपानीको चरम अभाव देखिएको भए पनि सरकारकोतर्फबाट कुनै सार्थक प्रयास नभएकामा गुनासो गरे।

स्वतन्त्र सांसद योगेन्द्र मण्डलले विराटनगर रंगेलीमा निर्माणाधीन हुलाकी राजमार्गको काममा भइरहेको ढिलासुस्तीबारे चर्चा गर्दै स्थानीयलाई धुलो र हिलोको समस्या समाधान गर्न माग गरे।

नेपाली कांग्रेसका सांसद नागिना यादवले केही दलका सांसदले सदनमा अप्रमाणित विषयमा पटक पटक धारणा राखेका कारण सांसदहरूको मर्यादा र गरिमामाथि प्रश्न उठेको बताइन्।

नेकपा(एमाले)का सांसद तारा लामा तामाङले कञ्चनपुरको कृष्णपुरमा एक महिलाको छाउगोठमा मृत्यु भएको घटनाप्रति दुःख व्यक्त गर्दै मृतक परिवारलाई उचित राहतको व्यवस्था गर्न सरकारको ध्यानाकर्षण गराए।