दाङस्थित बबई नदीमा बगेर २ किशोरको मृत्यु

दाङ– दाङस्थित बबई नदीमा पौडी खेल्ने क्रममा बगेर दुई किशोरको मृत्यु भएको छ। 

बबई गाउँपालिका–५, पुरन्धारा छहरानजिकै भएको यस घटनामा तुलसीपुर उपमहानगरपालिका–७ का १७ वर्षीय विधान केसी र तुलसीपुर–५ का १८ वर्षीय कुशल बुढा मगरको मृत्यु भएको प्रहरीले जनाएको छ।

जिल्ला प्रहरी कार्यालय दाङका प्रमुख एसपी अर्जुनप्रसाद तिमिल्सिनाका अनुसार, सोमबार दिउँसो करिब २ बजेतिर तीन जना साथी नदीमा पौडी खेल्न पसेका थिए।

तीमध्ये एक जना पौडेर बाहिर निस्कन सफल भए पनि विधान र कुशल बेपत्ता भएका थिए। बगेका उनीहरूको शव नेपाल प्रहरी, सशस्त्र प्रहरी र स्थानीयको सहयोगमा घटनास्थलभन्दा करिब ५० मिटर तल फेला परेको तिमिल्सिनाले जानकारी दिए।

मृतकको शव पोस्टमार्टमका लागि राप्ती प्रादेशिक अस्पताल तुलसीपुरमा ल्याइको प्रहरीले जनाएको छ।