पार्टीभित्र खुल्ला र पारदर्शी छलफल गर्नुपर्छ : कांग्रेस महामन्त्रीद्वय थापा र शर्मा

काठमाडौँ– नेपाली कांग्रेसका महामन्त्रीद्वय गगन थापा र विश्वप्रकाश शर्माले पार्टीमा खुला र पारदर्शी छलफल गर्नुपर्ने बताएका छन्। शनिबार मेलमिलाप दिवसको शुभकामना सन्देश जारी गर्दै महामन्त्रीद्वय थापा र शर्माले कम-कमजोरी स्विकार्दै खुला र पारदर्शी छलफलमार्फत कांग्रेसको आगामी मार्गचित्र तय गर्नुपर्ने बताएका हुन्।

कांग्रेसले गम्भीर आत्मसमीक्षा र आत्ममूल्यांकन गर्दै सुविचारित ढंगबाट अबको बाटो तय गर्ने उल्लेख गरेका छन्। गत मंसिर ४ मा सम्पन्न निर्वाचनपश्चात् प्रतिनिधिसभामा सबैभन्दा ठूलो दल भएर पनि कांग्रेस प्रतिपक्ष बन्न पुगेको छ।

“नेपाली जनताको मतबाट हामी पहिलो दलका रूपमा विजयी भएकै हौँ। तर गठबन्धनको सरकार बनाउन पर्याप्त गृहकार्य र सावधानी पुर्‍याउन नसक्दा केबल सत्ताको राजनीतिमा यो पटक पछि परेका मात्रै हौँ", विज्ञप्तिमा उल्लेख छ। 

निर्वाचनका बेला एउटा गठबन्धन र एउटा वाचा बन्धन गरेर जाने तर निर्वाचनपछि अर्कै बाटो हिँड्ने बेइमानी आफूहरूबाट नभएको उनीहरूले उल्लेख गरेका छन्। कांग्रेसले वर्तमान सरकारलाई गुण र दोषका आधारमा मूल्यांकन गर्ने, जनताप्रति जबाफदेही बनाउन जिम्मेवार प्रतिपक्षका रूपमा सशक्त भूमिका निर्वाह गर्नुपर्ने उनीहरूको भनाइ छ।