इजरायलद्वारा सिरियाली सेनाको मुख्यालयमा आक्रमण

काठमाडाैँ– इजरायलले बुधबार सिरियाली सेनाको मुख्यालयमा आक्रमण गरेको छ। अन्तर्राष्ट्रिय समाचार संस्था अल जजिराका अनुसार सिरियाली सुरक्षा बल र ड्रुज सशस्त्र समूहबीच जारी द्वन्द्वको क्रममा इजरायलले दमास्कसको राष्ट्रपति भवननजिकै रहेको रक्षा मन्त्रालयमा आक्रमण गरेको हो।

सिरियाली स्वास्थ्य मन्त्रालयले यस आक्रमणमा एक जनाको मृत्यु भएको र १८ जना घाइते भएको बताएको छ। साथै, सिरियाली सरकारले आक्रमणको निन्दा गर्दै यसलाई 'आपराधिक र गैरकानूनी व्यवहार' भनेको छ।

इजरायली सेनाले दमास्कसको सिरियाली सेनाको मुख्यालयमा ठूलो क्षति पुगेको दाबी गरेको छ। "चेतावनीको समय सकिएको छस अब कठोर र पीडादायी प्रहारहरू हुनेछन्," इजरायलका रक्षामन्त्री इजरायल काट्जले भने।

यस्तै, प्रधानमन्त्री बेन्जामिन नेतान्याहूले ड्रुज समुदायलाई बचाउन र सिरियाली शासनको गिरोहलाई नष्ट गर्न काम भइरहेको बताएका छन्। उनले ड्रुज समुदायका इजरायली सदस्यहरूलाई सिरियामा सीमा पार नगर्न पनि आग्रह गरे।

इजरायलमा ड्रुज समुदायलाई सामान्यतया वफादार अल्पसंख्यक मानिन्छ, र तिनीहरू इजरायली सेनामा पनि सेवा गर्छन्।

सिरियाको विदेश मन्त्रालयले सबै देशहरूलाई सिरियाको सार्वभौमसत्ताको सम्मान गर्न र कुनै पनि विद्रोही वा पृथकतावादी गतिविधिहरूलाई समर्थन नगर्न अपील गरेको छ। साथै, सिरियालीहरूलाई हिंसा रोक्न, हतियार राख्न र देशमा विभाजन छर्न खोज्नेहरूलाई विफल पार्न आग्रह गरिएको छ।