बांग्लादेशमा हिंसा चर्कियो, ४ जनाको मृत्यु

बांग्लादेशमा अपदस्थ प्रधानमन्त्री शेख हसिनाका समर्थक र सुरक्षाकर्मीबीच बुधबार भएको झडपमा कम्तीमा चार जनाको ज्यान गएको छ। अन्य दर्जनौँ घाइते भएका अस्पतालका अधिकारी र स्थानीय सञ्चारमाध्यमले दिएका छन्।

गत वर्ष अगस्टमा शेख हसिनाविरुद्ध आन्दोलन गरेका विद्यार्थीले नयाँ पार्टी बनाएपछि हिंसा शुरू भएको थियो। उनीहरूको ‘नेसनल सिटिजन पार्टी’ले हसिनाको गाउँ गोपालगन्ज (जुन उनको पार्टीको गढ पनि हो) तर्फ मार्च गर्ने घोषणा गरेपछि बुधबार बिहानैदेखि हिंसा भड्किएको थियो। पछि अधिकारीहरूले गोपालगन्जमा रातभरका लागि कर्फ्यु लगाए।

हसिनालाई ११ महिनाअघि पदबाट हटाएपछि बांग्लादेशमा हिंसात्मक झडप बढेको छ। बुधबारको घटनाले देशमा ठूलो विभाजन रहेको देखाउँछ। किनभने अन्तरिम सरकारले बिग्रँदो सुरक्षा व्यवस्थालाई सम्हाल्न सकिरहेको छैन।

टेलिभिजनमा देखिएको भिडियो फुटेजमा हसिनाका समर्थकले लठ्ठीसहित प्रहरीलाई आक्रमण गरिरहेको र गाडीमा आगो लगाइरहेको देखिन्छ। यो घटना विद्यार्थी पार्टीका नेतालाई बोकेका करिब २० वटा गाडीको लस्कर आन्दोलनको सम्झना गर्न पुगेका बेला भएको हो।

पार्टीका नेताले नजिकैको प्रहरी प्रमुखको कार्यालयमा शरण लिएका थिए। भिडियोमा उनीहरूलाई सैनिकले सुरक्षा दिएर बख्तरबन्द गाडीमा चढाएर सुरक्षित स्थानमा पुर्‍याइएको देखाइएको छ। पछि उनीहरू सुरक्षाकर्मीको निगरानीमा छिमेकी जिल्लातर्फ लागियो।

सरकारी अस्पतालका वरिष्ठ अधिकारी जिबितेश विश्वासले कम्तीमा तीन जनाको शव अस्पताल ल्याइएको पुष्टि गरे। यता, बांग्लादेशको प्रमुख अंग्रेजी दैनिक डेली स्टारले भने चार जनाको मृत्यु भएको जनाएको छ।

अन्तरिम सरकारले बुधबार विद्यार्थीमाथि आक्रमण गर्नेलाई कारबाही गर्ने बताएको छ। अन्तरिम नेता मुहम्मद युनुसका तर्फबाट जारी विज्ञप्तिमा गोपालगन्जको हिंसालाई ‘पूर्ण रूपमा अक्षम्य’ भनिएको छ।

गत मेमा प्रतिबन्ध लगाइएको हसिनाको अवामी लिग पार्टीले सामाजिक सञ्जाल एक्स (पहिले ट्विटर)मार्फत धेरै विज्ञप्ति जारी गर्दै हिंसाको निन्दा गरेको छ। पार्टीले मृत्यु र घाइतेका लागि अन्तरिम सरकारलाई दोषी देखाएको छ। “हामी विश्वलाई सुरक्षा बलको यो दुरुपयोगमा ध्यान दिन आग्रह गर्दछौँ,” अवामी लिगले भनेको छ।

विद्यार्थी नेता नाहिद इस्लामले गोपालगन्ज हिंसाका दोषीलाई २४ घण्टाभित्र पक्राउ गर्न सरकारलाई अल्टिमेटम दिएका छन्। उनले बिहीबार छिमेकी जिल्ला फरिदपुरमा पनि अर्को प्रदर्शन हुनसक्ने संकेत दिएका छन्।

दक्षिणपन्थी जमात-ए-इस्लामी पार्टीले विद्यार्थी नेतृत्वको पार्टीमाथि भएको आक्रमणको निन्दा गर्दै बिहीबार सबै जिल्ला र मुख्य शहरमा विरोध प्रदर्शनको घोषणा गरेको छ।

अन्तरिम सरकारका आलोचकले देशमा मानिसहरूबीचको विभाजन बढिरहेको बताएका छन्। उनीहरूका अनुसार, युनुसको सरकारले शान्ति ल्याउने भने पनि देशमा मेलमिलापको सम्भावना कम हुँदै गएको छ। यदि अवस्था यस्तै अवस्था रहे लोकतन्त्रमा शान्तिपूर्ण तरिकाले सत्ता हस्तान्तरण हुन गाह्रो हुने उनीहरूको भनाइ छ।

नोबेल शान्ति पुरस्कार विजेता मुहम्मद युनुस हसिनालाई पदबाट हटाई भारत भागेको तीन दिनपछि देशको नेतृत्वमा आएका थिए। उनले व्यवस्था फर्काउने र अर्को वर्ष अप्रिलमा नयाँ निर्वाचन गर्ने वाचा गरेका छन्।

हसिनालाई अहिले मानवताविरुद्धको अपराधको आरोप लागेको छ। सरकारले भारतबाट उनको सुपुर्दगीका लागि अनुरोध गरेको छ। भारतले भने अहिलेसम्म जवाफ दिएको छैन।

गोपालगन्ज राजनीतिक रूपमा संवेदनशील जिल्ला हो। यहाँ हसिनाका बुबा शेख मुजीबुर रहमानको समाधिस्थल छ। सन् १९७५ मा सैन्य विद्रोहमा उनको अधिकांश परिवारसहित हत्या गरिएपछि उनलाई त्यहीँ गाडिएको थियो।

नेसनल सिटिजन पार्टीले यसै महिनाको शुरूमा ‘जुलाई मार्च टु रिबिल्ड द नेसन’ अभियान शुरू गरेको थियो। उनीहरूले बांग्लादेशी राजनीतिमा नयाँ शक्तिको रूपमा आफूलाई स्थापित गर्न सबै जिल्लामा मार्च गर्ने बताएका छन्।

बांग्लादेशको राजनीतिक इतिहासमा प्रायः दुई ठूला वंशवादी दलको प्रभुत्व रहेको छ। एउटा हसिनाको अवामी लिग हो भने अर्को उनका प्रतिद्वन्द्वी तथा पूर्वप्रधानमन्त्री खालिदा जिया को नेतृत्वमा रहेको बांग्लादेश नेसनलिस्ट पार्टी (बीएनपी)। हसिनाको पार्टीको अनुपस्थितिमा सत्तामा आउने आशा राखेको बीएनपीले बुधबारको हिंसाका बारेमा भने मौन छ।