पर्वतको लाङ्दीमा पहिरोले घर पुरिँदा २ जना बेपत्ता

पर्वत– मोदी गाउँपालिका–३ देउरालीको लाङ्दीमा पहिरामा घर पुरिँदा दुई जना बेपत्ता भएका छन्। 

एकतले घर पुरिँदा ७६ वर्षीय छविलाल विश्वकर्मा र उनकी श्रीमती ७६ वर्षीया विष्णुमती बेपत्ता भएका हुन्। बुहारी ३२ वर्षीया पवित्रा भने भाग्न सफल भएको मोदी –३ का वडा सदस्य सन्तोष विकले जानकारी दिए। 

उनका अनुसार स्थानीयले उद्धारकार्य जारी राखेका छन्। जिल्ला प्रहरी कार्यालयका प्रहरी निरीक्षक रामप्रसाद सापकोटाले घटनास्थलतर्फ प्रहरी पठाइएको जानकारी दिए। 

शनिबार रातिदेखि पर्वतलगायत आसपासका क्षेत्रमा भीषण वर्षा भइरहेको छ। यस क्षेत्रका खोला तथा नदीहरूमा समेत बहाव उच्च भइरहेको छ।