भारतको हरिद्वारस्थित मनसा देवी मन्दिरमा भागदौड मच्चिँदा ६ जनाको मृत्यु

भारतको उत्तराखण्ड राज्यस्थित हरिद्वारमा रहेको एक प्रसिद्ध हिन्दू मन्दिरमा आइतबार भीडभाड भई भागदौड मच्चिँदा कम्तीमा ६ जनाको मृत्यु भएको छ। घटनामा १० जनाभन्दा बढी घाइते भएका छन्।

हिन्दू धर्मावलम्बीहरूको पवित्र शहर हरिद्वारस्थित गंगा नदीको किनारमा रहेको मनसा देवी मन्दिर जाने सिँढीमा भागदौड मच्चिएको शहरका वरिष्ठ प्रहरी अधिकारी परमेन्द्र डोभलले एएफपीलाई जानकारी दिए। “६ जनाको मृत्यु भएको छ भने १० भन्दा बढी घाइतेलाई अस्पतालमा भर्ना गरिएको छ,” उनले भने।

उत्तराखण्डका मुख्यमन्त्री पुष्करसिंह धामीले घटनाप्रति दुःख व्यक्त गर्दै राहत र उद्धारकार्य जारी रहेको बताएका छन्। उनले यस विषयमा स्थानीय प्रशासनसँग निरन्तर सम्पर्कमा रहेको र स्थितिको निरन्तर अनुगमन भइरहेको जानकारी दिए।

भारतमा धार्मिक चाडपर्वहरूमा घातक भागदौड र अत्यधिक भीडभाडका कारण यस्ता दुखद् घटनाहरू बेलाबेलामा हुने गरेका छन्।

यसअघि गत जुन महिनामा तटीय राज्य उडिसामा एक हिन्दू चाडमा भएको भागदौडमा कम्तीमा तीन जनाको मृत्यु भएको थियो।

अघिल्लो महिना पश्चिमी राज्य गोवामा अग्नि लिएर गरिने एक अनुष्ठानमा हजारौँ मानिस भेला भएका बेला भएको घटनामा तीन जनाको मृत्यु भएको थियो।

जनवरीमा उत्तरी शहर प्रयागराजमा हिन्दूहरूको महान् चाड कुम्भ मेलामा भएको झडपमा कम्तीमा ३० जनाको मृत्यु भएको थियो।