बागमतीका मुख्यमन्त्री लामाको राजीनामा

बागमती– बागमती प्रदेशका मुख्यमन्त्री बहादुरसिंह लामाले पदबाट राजीनामा दिएका छन्। आइतबार हेटौँडामा पत्रकार सम्मेलन गरी उनले राजीनामाको घोषणा गरेका हुन्।

राजीनामा बुझाउन उनी आइतबार साँझ प्रदेश प्रमुखको कार्यालयमा पुगे पनि प्रदेश प्रमुख दीपकप्रसाद देवकोटा त्यहाँ नभएकाले राजीनामा बुझाउन सकेनन्। उनले सोमबार प्रदेश प्रमुख हेटौँडा आएपछि राजीनामा पत्र बुझाउने जानकारी दिएका छन्।

साउन १४ गते भएको पार्टी संसदीय दलको नेतामा पराजित भएपछि पार्टी सभापति शेरबहादुर देउवाको निर्देशनमा मुख्यमन्त्री लामाले पदबाट राजीनामा दिएका हुन्। 

मुख्यमन्त्री लामाले पार्टीभित्रको बृहत् छलफलपश्चात् राजनीतिक मूल्य, मान्यता स्थापित गर्न उचित ठानेर पार्टी सभापतिले आपसी समझदारीमा सरकार सञ्चालन गर्नेगरी मार्ग प्रशस्त गर्न भनेपछि आफूले राजीनामा दिन लागेको बताए। उनले नवनिर्वाचित पार्टी संसदीय दलका नेता इन्द्रबहादुर बानियाँको नेतृत्वमा सहमति र सहकार्य गरेर अगाडि बढ्ने प्रतिबद्धता व्यक्त गरे। 

मुख्यमन्त्री लामाले तहगत सरकार र प्रदेशसभामा प्रतिनिधत्व गर्ने सबै दलसँग प्रभावकारी समन्वयमार्फत प्रदेशवासीको विकास र समृद्धिको आकांक्षा पूरा गर्ने दिशातर्फ सरकार उन्मुख रहेको उल्लेख गरे। गत वर्षको बाढी र पहिरोबाट सिर्जित विपद्को सामना र पुनर्निर्माणमा सीमित स्रोतसाधनको बाबजुद प्रदेशको बलियो उपस्थिति जनाएको उनको जिकिर थियो। 

आफूले इमानदारीपूर्वक काम गरे पनि प्रदेश सरकार अचानक ढाल्ने प्रपञ्चले स्थिरता र स्थायित्वको प्रतिबद्धतामाथि प्रश्न उठेका मुख्यमन्त्री लामाको भनाइ छ। “यस्तै षडयन्त्र र प्रपञ्च परम्पराका रूपमा स्थापित भएमा र अन्य प्रदेशमा पनि यस्ता कार्य शुरू भएमा देश कता जान्छ? यो घटनाले गम्भीर प्रश्न मात्रै होइन लोकतान्त्रिक गणतन्त्रमाथि नै खतराको आशंका जन्माएको छ”, उनले भने।