पहिरोका कारण अवरुद्ध पाल्पा–बुटवल सडकखण्ड एकतर्फी खुल्यो

पाल्पा– पहिरोले अवरुद्ध सिद्धार्थ राजमार्गअन्तर्गतको पाल्पा–बुटवल सडकखण्ड एकतर्फी रूपमा सञ्चालनमा आएको छ।

सिद्धबाबा क्षेत्रका तीन ठाउँमा ढुंगासहित पहिरो खसेपछि सोमबार साँझदेखि पूर्णरूपमा अवरुद्ध बनेको सडक मंगलबार बेलुकादेखि एकतर्फी सञ्चालनमा आएको हो।

वर्षा रोकिएपछि चाइना स्टेट कन्स्ट्रक्सन इन्जिनियरिङ कर्पोरेसनको सहयोगमा पहिरो पन्छाएर सडक एकतर्फी रूपमा सञ्चालनमा ल्याइएको जिल्ला ट्राफिक कार्यालयका प्रमुख प्रवीण आचार्यले जानकारी दिए।

राजमार्गको पाल्पा तिनाउ गाउँपालिका–३, दोभान सिद्धबाबा क्षेत्रको नागडाँडा, ड्यामसाइड, सिद्धबाबालगायत स्थानमा खसेका पहिराले सोमबार बेलुकीदेखि सडक अवरुद्ध भएको थियो। निरन्तरको वर्षाका कारण सडकमा खसेका पहिरो पन्छाउन नसकेर राजमार्ग खुलाउन ढिलाइ भएको प्रमुख आचार्यले बताए।

“पानी परिरहेको र माथिबाट ढुंगासहितको पहिरो झर्न नरोकिएकाले केही समस्या आएको हो। अहिले डोजर लगाएर दुवैतर्फ खुलाउने प्रयास भइरहेको छ,” उनले भने।

सोमबार दिनभर बेला–बेलामा पहिरो पन्छाएर एकतर्फी सवारी सञ्चालन गरे पनि साँझ तिरबाट पुनः निरन्तर वर्षा भइरहेकाले पहिरो निरन्तर खसेपछि राजमार्ग पूर्ण रूपमा अवरुद्ध भएको थियो। पानी रोकिनासाथ कर्पोरेसनले डोजर लगाएर सडक खुलाउन सहयोग गरेको उनको भनाइ छ।

पुनः पानी पर्नासाथ राजमार्गको माथिल्लो भेगबाट ढुंगा खसेपछि सवारीसाधन रोकिने ट्राफिक कार्यालयले जनाएको छ। यात्रुलाई जोखिमका बेला अत्यावश्यकबाहेक यात्रा नगर्न दोभान प्रहरी चौकीले अनुरोध गरेको छ। 

पानी परेर सिद्धबाबा खण्डमा पहिरो खस्ने, ढुंगा खस्ने भएपछि प्रहरीचौकी दोभान, प्रभास, बर्तुङले सवारीसाधन रोक्दै गरेका छन् ।

पहिरोले सडक अवरुद्ध भएपछि स्याङ्जा, पोखरा, बागलुङ, गुल्मी, अर्घाखाँची तथा जिल्लाकै विभिन्न स्थानबाट आवतजावत गर्ने सवारीसाधन बाटोमा रोकिएका थिए। सडक एकतर्फी खुलेपछि सवारी गन्तव्यतर्फ लागेका छन्।