इटहरी-धरान सडकखण्डमा सवारी दुर्घटना हुँदा २ जनाको मृत्यु

सुनसरी–सुनसरीको इटहरी उपमहानगरपालिका–२०, पानीपिया जंगलमा शनिबार स्कुटर र बस एकापसमा ठोक्किँदा दुई जनाको मृत्यु भएको छ।

इटहरीबाट धरानतर्फ आउँदै गरेको प्रदेश १–०२–००२ ख ०४५५ नम्बरको बस र विपरीत दिशाबाट आइरहेको को २२ प २१२५ नम्बरको स्कुटर ठोक्किँदा दुर्घटना भएको हो। दुर्घटनामा स्कुटरमा सवार दुई जना गम्भीर घाइते भएकोमा उपचारका क्रममा मृत्यु भएको थिए।

मृत्यु हुनेहरूमा झापाको विर्तामोड नगरपालिका–५ का स्कुटर चालक सुजन विक र पछाडि सवार सुरज विक रहेका छन्। उनीहरूको धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा दिउँसो १२:३० बजे निधन भएको जिल्ला प्रहरी कार्यालयका प्रवक्ता योगराज खतिवडाले जानकारी दिए।

प्रहरीले बस चालक उदयपुरको बेलका नगरपालिका–३ का प्रेम मगरलाई नियन्त्रणमा लिएर घटनाबारे थप अनुसन्धान भइरहेको जनाएको छ।