गैँडाकोटमा ट्रक र स्कुटर ठोक्किँदा चालकसहित २ जनाको मृत्यु

नवलपुर– नवलपरासी (बर्दघाट–सुस्तापूर्व) को गैँडाकोट–१० स्थित सिस्नेपुलमा आइतबार ट्रकले स्कुटरलाई ठक्कर दिँदा दुई जनाको मृत्यु भएको छ।

जिल्ला प्रहरी कार्यालयका सूचना अधिकारी प्रहरी नायब उपरीक्षक मधु नेपालका अनुसार, नारायणघाटबाट कावासोतीतर्फ जाँदै गरेको ना५ख ८४१७ नम्बरको ट्रकले नारायणघाटतर्फ जाँदै गरेको लु५५प ३१३४ नम्बरको स्कुटरलाई ठक्कर दिएको थियो।

ट्रकको ठक्करबाट स्कुटरमा सवार व्यक्ति र अनियन्त्रित भई पल्टिएको सोही ट्रकका चालकको मृत्यु भएको हो।

दुवै जनाको शव चितवनको भरतपुर अस्पतालमा राखिएको छ भने उनीहरूको पहिचान खुल्न बाँकी रहेको प्रहरीले जनाएको छ।