सुनसरीमा बस–माइक्रो ठोक्किँदा चार जनाको मृत्यु, २३ यात्रु घाइते

इटहरी– सुनसरीको भोक्राहा नरसिंह गाउँपालिका–३ जलुवाटोलस्थित पूर्व–पश्चिम राजमार्गमा सोमबार बिहान बस र माइक्रोबस ठोक्किँदा चार जनाको मृत्यु भएको छ भने २३ जना यात्रु घाइते भएका छन्।

जिल्ला प्रहरी कार्यालय सुनसरीका अनुसार, काँकडभिट्टाबाट दिक्तेलतर्फ जाँदै गरेको मे १ ख १७९९ नम्बरको बस र विपरीत दिशाबाट आइरहेको प्रदेश २–०१–००१ ज ००४७ नम्बरको माइक्रोबस ठोक्किएका हुन्।

दुर्घटनामा ज्यान गुमाउनेहरूमा सप्तरीका अन्दाजी ३५ वर्षीय शंकर मण्डल, सुनसरीका अन्दाजी ७० वर्षीय लक्ष्मण सदा, विराटनगरका अशोक यादव र एक अन्दाजी ४५ वर्षीया महिला रहेको प्रहरीले जनाएको छ।

घाइते भएका २३ जनामध्ये केहीको अवस्था सामान्य रहेको र केहीको मध्यम चोट रहेको प्रहरीले जनाएको छ। उनीहरूको विराटनगरस्थित गोल्डेन अस्पताल, बिराट नर्सिङ होम र जिल्ला अस्पताल इनरुवामा उपचार भइरहेको छ। घाइतेहरू मोरङ, खोटाङ, उदयपुर, झापा, इलाम, सप्तरी र सुनसरीका बासिन्दा रहेको बताइएको छ।

प्रहरीले बस चालक झापा अर्जुनधारा नगरपालिका–१ का गोपाल अधिकारीलाई नियन्त्रणमा लिएको छ। जिल्ला प्रहरी कार्यालय सुनसरीका प्रवक्ता योगराज खतिवडाले घटनाबारे थप अनुसन्धान भइरहेको जानकारी दिए।