सुदूरपश्चिम क्षेत्रमा वर्षा जारी, शुक्रबारबाट बिस्तारै कम हुने

काठमाडौँ– नेपालको सुदूरपश्चिमका विभिन्न जिल्लामा केन्द्रित भएर वर्षा भइरहेको छ। अहिले कञ्चनपुर, डडेलधुरा, डोटी, दार्चुला, कैलाली, अछाम र यता कास्कीका केही क्षेत्रमा वर्षा भइरहेको मौसम विज्ञान विभाग, मौसम पूर्वानुमान महाशाखाका मौसमविद् डेभिट ढकालले जानकारी दिए।

विभागका अनुसार पछिल्लो १२ घण्टाको वर्षा मापन अनुसार डोटीमा ८८.६ मिलिमिटर वर्षा भएको छ। कैलालीमा ७४.६ र बैतडीमा ६९.४ मिलिमिटर वर्षा भएको उनले बताए।

गएरातिदेखि पश्चिम नेपालमा मनसुन बढी सक्रिय भएको विभागले जनाएको छ। बुधबार देशैभर सक्रिय भएको मनसुन बिहीबार भने पश्चिममा बढी सक्रिय देखिएकाले ती क्षेत्रमा निरन्तर वर्षा भइरहेको मौसमविद् ढकालले उल्लेख गरे। 

“पछिल्लो २४ घण्टाको मापन हेर्दा भने सबैभन्दा बढी वर्षा बैतडीमा ११६, डोटीमा ९२.४, कैलालीमा ९०.६ र अछाममा ९८ मिलिमिटर वर्षा भएको छ,” उनले भने। 

उनका अनुसार सिन्धुपाल्चोक, नुवाकोट, कास्की, पर्वत जिल्लामा पनि भारी वर्षा भएको जनाउँदै उनले धेरै वर्षा मापन केन्द्रहरूमा भारी वर्षा भएको अभिलेख रहेको बताए। पछिल्लो तीन घण्टाको रेकर्डअनुसार कैलाली, दार्चुला, बैतडी, डडेलधुरा तथा आसपासका जिल्ला पनि निरन्तर वर्षा भएको छ।

जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा पश्चिममा नेपालको तराई आसपास र पूर्वमा तराईभन्दा केही दक्षिणतिर रहेकाले मनसुन नेपालको पूर्वी भू–भागभन्दा पश्चिमतर्फ बढी सक्रिय भइरहेको हो।

हाल देशभर साधारणतया बदली भई सुदूरपश्चिम प्रदेशको पहाडी र तराईलगायत बाँकी प्रदेशको पहाडी भू–भागका केही स्थानमा वर्षा भइरहेको छ। बिहीबार रातिदेखि बिस्तारै वर्षाका गतिविधि कम हुने विभागले जनाएको छ।

मौसमविद् ढकालले भने, “वर्षा रोकिने नै चाहिँ हुँदैन, तर भारी वर्षा कम हुने देखिएको छ, छिटपुट ठाउँमा मात्रै भारी वर्षा हुन्छ, बदली भने कायमै रहने छ।”