हेटौँडा–काठमाडौँ जोड्ने दुई सडक अवरुद्ध

मकवानपुर– हेटौँडा–काठमाडौँ जोड्ने दुई प्रमुख सडकखण्डमा पहिरो खस्दा यातायात सेवा पूर्ण रूपमा अवरुद्ध भएको छ। जिल्ला प्रहरी कार्यालय मकवानपुरका अनुसार, हेटौँडा–फाखेल–दक्षिणकाली सडक र त्रिभुवन राजपथ दुवै अवरुद्ध भएका छन्।

हेटौँडा–फाखेल–दक्षिणकाली काठमाडौँ सडकअन्तर्गत मकवानपुरको इन्द्रसरोवर गाउँपालिका-३, ज्यामिरेमा शनिबार बिहान ९ः३० बजेतिर सुक्खा पहिरो खसेको थियो।

यस्तै, त्रिभुवन राजपथअन्तर्गत मकवानपुरको भीमफेदी गाउँपालिका–९, लामिडाँडानजिकै ढुंगा र रूख खस्दा सडक पूर्ण रूपमा अवरुद्ध भएको छ।

जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक श्यामु अर्यालले दुवै ठाउँमा डोजर परिचालन गरी पहिरो पन्छाउने काम भइरहेको जानकारी दिए।