टप एन्ड टी २० सिरिजमा नेपालको लगातार तेस्रो हार

काठमाडाैँ– अस्ट्रेलियाको नर्दन टेरिटोरीमा जारी टप एन्ड टी–२० सिरिजको आफ्नो तेस्रो खेलमा पनि नेपाल पराजित भएको छ। नेपाल पहिलो खेलमा एनटी स्ट्राइक र दोस्रो खेलमा बांग्लादेश ए सँग पराजित भएको थियो।

सोमबार भएको खेलमा मेलबर्न स्टार्स एकेडेमीले नेपाललाई ३१ रनले हराएको हो। मेलबर्न स्टार्स एकेडेमीको दिएको १७६ रनको लक्ष्य पछ्याएको नेपालले निर्धारित २० ओभरमा ८ विकेट गुमाएर १४४ रन मात्र बनाउन सक्यो।

नेपालका लागि ओपनर आसिफ शेखले अर्धशतक बनाए पनि जितका लागि पर्याप्त भएन। उनले ४९ बल खेल्दै ३ चौका र १ छक्काको सहयोगमा सर्वाधिक ५३ रन बनाए। कप्तान रोहित पौडेलले ३३ र कुशल भुर्तेलले २५ रन जोडे।

नेपालका लागि ओपनरद्वय कुशल भुर्तेल र आसिफ शेखले ३० रनको साझेदारी गर्दै राम्रो शुरूआत दिलाएका थिए। आक्रामक ब्याटिङ गरेका कुशल भुर्तेल १३ बलमा ४ चौका मदतमा २५ रन बनाएर चौथो ओभरमा आउट भए। लगत्तै भीम शार्की व्यक्तिगत १ रनमा आउट हुँदा  नेपाल ४ ओभरमा ३२–२ को स्थितिमा थियो। त्यसपछि ओपनर आसिफ र कप्तान रोहित पौडेलले तेस्रो विकेटका लागि ८७ रनको साझेदारी गर्दै नेपालको इनिङ्स अघि बढाएका थिए।

नेपालले अब होबार्ट हरिकेन्स, मेलबर्न रेनेगेड्स र पाकिस्तान शाहींससँग खेल्नेछ।