गाजा युद्ध: इजरायलमा चुलिँदै गएको निराशा देशव्यापी विरोध प्रदर्शनमा परिणत

गाजामा बाँकी रहेका बन्धकहरूको रिहाइको माग गर्दै आइतबार इजरायलमा हालसम्मकै सबैभन्दा ठूलो प्रदर्शन भएको छ। आयोजकहरूले यसमा सयौँ हजारले भाग लिएको दाबी गरेका छन्।

प्रदर्शनकारीहरूले सडक, चोक, सैन्य मुख्यालय र नेताहरूको घरअगाडि अवरोध सिर्जना गरेका थिए। यस क्रममा प्रहरीले ३८ जनालाई पक्राउ गरेको बताइएको छ। प्रदर्शनकारीहरूले गाजाबाट आएका कुपोषणग्रस्त बालबालिकाका तस्वीरहरू देखाउँदै युद्धले आम नागरिकलाई पुर्‍याइरहेको पीडाबारे आक्रोश पोखेका थिए। गाजामा हालसम्म २५० भन्दा बढी मानिस भोकमरी वा कुपोषणका कारण मृत्यु भएको छ।

गाजामा बाँकी ५० बन्धकमध्ये करिब २० जना मात्र जीवित रहेको विश्वास गरिएको छ। बन्धकका परिवारहरूले यसका लागि सरकार र हमास दुवैलाई दोष दिएका छन्।

पूर्वसैनिक र गुप्तचर अधिकारीहरूले पनि युद्ध अन्त्य गर्न सम्झौताको आवश्यकता औँल्याएका छन्। तर, प्रधानमन्त्री बेन्जामिन नेतान्याहुले भने ‘हमासलाई पराजित नगरेसम्म युद्ध रोक्ने आह्वानले बन्धक मुक्तिको प्रक्रियालाई ढिलाइ गर्ने र अर्को आक्रमण सुनिश्चित गर्ने’ भन्दै सम्झौतामा आपत्ति जनाइरहेका छन्। यसअघि केही बन्धक मुक्त गर्ने युद्धविराममा सहमति भएपछि नेतान्याहुको सरकार ढाल्ने धम्की आएको थियो। अर्थमन्त्री बेजलेल स्मोट्रिचले प्रदर्शनलाई ‘हमासको हातमा खेल्ने अभियान’ भनेर टिप्पणी गरेका छन्।

यसैबीच, गाजाका अस्पतालहरूले इजरायली सेनाले कम्तीमा १७ जना सहायता खोज्ने नागरिकलाई मारेको बताएका छन्। उनीहरू संयुक्त राष्ट्रसंघका ट्रकको पर्खाइमा थिए। प्रत्यक्षदर्शीहरूले सेनाले भीडतर्फ गोली चलाएको बताएका छन्। मध्य गाजाको बुरेज शिविरमा आक्रमण हुँदा थप तीन जना मारिएको खबर आएको छ।

गाजाको स्वास्थ्य मन्त्रालयका अनुसार युद्ध शुरू भएदेखि ६१ हजार ९०० भन्दा बढी मानिसको मृत्यु भइसकेको छ, जसमध्ये आधा महिला र बालबालिका छन्। आइतबार मात्रै कुपोषणका कारण दुई बालबालिका र पाँच वयस्कको मृत्यु भएको मन्त्रालयले जनाएको छ। संयुक्त राष्ट्रसंघले गाजामा भोकमरी सबैभन्दा उच्चस्तरमा पुगेको चेतावनी दिएको छ।

अब इजरायली सेना गाजा शहर, मुवासी र अन्य भिडभाड क्षेत्रहरूमा नयाँ आक्रमण गर्न तयारीमा रहेको बताइएको छ। सेनाले मानिसहरूलाई दक्षिणतर्फ सार्ने योजना बनाए पनि ‘सुरक्षित क्षेत्र’ भनिएका ठाउँहरूमा पनि बम प्रहार भएको छ। धेरै प्यालेस्टिनीले ‘गाजामा कतै सुरक्षित नभएको’ भन्दै आफ्नो स्थान नछोड्ने अडान लिएका छन्।

यसैबीच, इजरायलले यमनमा इरान समर्थित हुथी विद्रोहीमाथि हवाई आक्रमण गरेको छ। आक्रमणमा यमनको राजधानी सानाको पावर प्लान्ट क्षतिग्रस्त भएको छ। इजरायलले आफ्नो भूमिमा लक्षित क्षेप्यास्त्र र ड्रोन आक्रमणको जवाफमा हमला गरिएको बताएको छ। हुथीहरूले भने इजरायलको बेन गुरियन विमानस्थल लक्षित गरेको दाबी गरेका छन्।