तोलामा २ लाख रुपैयाँ नाघ्यो सुनको मूल्य

काठमाडौँ– सुनको मूल्यमा नयाँ कीर्तिमान कायम भएको छ।

नेपाल सुनचाँदी व्यवसायी महासंघका अनुसार आज तोलामा २ लाख ६०० रुपैयाँ पुगेर उच्च मूल्यको कीर्तिमान बनाएको हो। 

चाँदी प्रतितोला २ हजार ३६० रुपैयाँ पुगेको छ। बिहीबारको तुलनामा सुनको मूल्य तोलामा १ हजार २०० रुपैयाँले र चाँदी ५ रुपैयाँले बढेको महासंघले जनाएको छ। 

बिहीबार एक तोला सुन १ लाख ९९ हजार ४०० रुपैयाँमा किनबेच भएको थियो। त्यति नै परिमाणको चाँदी २ हजार ३५५ रुपैयाँ रहेको थियो।  

अन्तर्राष्ट्रिय सञ्चारमाध्यमका अनुसार प्रतिऔँस सुन ३ हजार ४०८ अमेरिकी डलरमा कारोबार भइरहेको छ।